ادویات کے تاثیری نام اور ان کی تشریح

(تحقیق و تحریر: حکیم سید عبدالوہاب شاہ)

استرخا

استرخا کا مطلب ہے کمزوری۔ کسی عضو وغیرہ کا ڈھیلا پڑ جانا، تناؤ کا کم ہونا، حس و حرکت ختم ہونا، سو جانا۔ ایک بیماری جس میں کل بدن یا کسی عضو کی قوت حرکت ضعیف یا زائل ہو جاتی ہے، یا کسی عضو میں حس و حرکت ختم ہونے کو استرخا کہا جاتا ہے۔ فالج اوراسترخا دونوں ایک ہی ہیں لیکن فالج ایسے استرخاء کو کہتے ہیں جو بدن کو لمبائی میں تقسیم کر دیتا ہے اور بدن کے ایک ہی جانب ہوتا ہے۔ چنانچہ ایک فالج سرسے قدم تک اور دوسری قسم سر کے نیچے سے قدم تک ہوتی ہے۔

اکال:

اکال کا مطلب ہے عضو کو کھا جانے والی(Corrosive)

ایسی دوائیں جن میں تحلیل کرنے کی قوت کی زیادتی ہوتی ہے اور وہ اپنی اس تیزی کی وجہ سے عضو کو فنا کرنے اور گوشت کو کھاجانے کی طاقت رکھتی ہیں۔ مثلا :

جلا ہوا سیپ۔ سیندور۔ چوک۔ نمک اشنان۔ زنگار۔ انزوت(لائی توتیا۔  نورہ(چونا)۔ مس سوختہ۔

دافع تشنج:

تشنج کہتے ہیں: سکیڑ ،  اینٹھن   ، جکڑاؤ  ، اکڑاؤ،  انقباض     ، مروڑ  ،   کھچاؤ، پیچ و تاب۔ تشنج پٹھوں اور نسوں کا اپنے آپ اینٹھ جانا ہے جس سے بدن اور اعضا اپنی حالت سے مڑ جاتے ہیں  جسم سخت اکڑ جاتا ہے جیسے تختہ  ۔ تشنج ، جسے لاک جا کے نام سے بھی جانا جاتا ہے، ایک بیکٹیریل انفیکشن ہے جس کی خصوصیت پٹھوں میں کھچاؤ یا اکڑاؤ ہوتی ہے۔ سب سے عام قسم میں، اینٹھن جبڑے میں شروع ہوتی ہے اور پھر باقی جسم میں پھیل جاتی ہے۔ ہر اینٹھن عام طور پر چند منٹ تک جاری رہتی ہے۔ اینٹھن تین سے چار ہفتوں تک کثرت سے ہوتی ہے۔ کچھ اینٹھن یا اکڑاؤ اتنے شدید ہو سکتے ہیں کہ ان سے ہڈیاں ٹوٹ سکتی ہیں۔

دافع تشنج ان ادویات کو کہتے ہیں جو مندرجہ بالا بیماری یا علامات کو ختم کرتی ہیں۔

دافع صلابت:

صلابت کا مطلب ہے سختی۔ یعنی معدے یا جگر کے مقام کی سختی۔ دافع صلابت ان ادویات کو کہتے ہیں جو جسم کے اندر پیدا ہونے والی سختیوں کو ختم کرے۔

جاذب:

جاذب کا مطلب ہے کھینچنے والی۔ (absorbent, Desiccant)

وہ دوائی جو نہایت ہی گرم اور لطیف ہوتی ہیں جس کی وجہ سے رطوبات یا اخلاط کو کھینچ کر اس مقام پر لاتی ہیں جہاں سے مادہ بہ آسانی نکل سکے۔ جیسے:

لہسن ۔ گندہ بیروزہ۔ کیکڑا۔ نیولا۔ مینڈک۔  اود بلاؤ کے خصیے۔ پنواڑ۔ غاریقون۔ کوڑی اور گھونگے کا گوشت”۔

جالی:

جلا اور پاک کرنے والی۔ (Detergent, Cleaner)

وہ دوائیں جو جلد کی سطح  کوچھیل کر لیسدار رطوبات کو صاف کردیتی ہیں۔ ۔ جیسے:

ابہل، بلسان کے بیج۔ زفت۔ کبوتر کی بیٹ۔ لہسن۔ مسور۔ عقرقرحا۔ کٹکی۔ پھٹکڑی۔ نوشادر۔ نک چھکنی۔ ہڑتال۔ مصری۔ نمک۔ شہد، شورہ۔ انزروت۔ بابچی۔ ہلدی۔ چیتا۔ رائی۔ خولنجاں۔ بنفشہ کی جڑ۔ کف دریا یعنی سمندر جھاگ۔

جامد:

جامد کا مطلب ہے جما دینے والی۔ (Coagulant)

وہ دوائیں جو پتلے اخلاط  کو گاڑھا اور سخت کرکے جما دیتی ہیں۔ جیسے:

 اجوائن خراسانی ۔ برگد کا دودھ۔ صمغ عربی۔ موم۔ کہربا۔ کتیرا۔ نشاستہ۔ گیرو۔ گل ملتانی۔

حالق، حلاق:

بالوں کو اڑانے والی(Hair Remover)

وہ دائی جو بالوں کو کمزور کرکے اکھاڑ دیتی ہے۔مثلا: نورہ۔ چونا۔ ہڑتال۔ سفیدہ اور راکھ۔

حَکاک۔ محکک:

حکاک کا مطلب ہے : کھجلی پیدا کرنے والی۔ (Irritant, Itchy)

وہ دوائیں جو اپنی گرمی اور تیزی کی وجہ سے گاڑھی اخلاط  کو مساموں کی طرف کھینچتی ہیں  اور خراش کی وجہ سے کھجلی پیدا کرتی ہیں۔ مثلا :

 اروی کے پتے ۔ بیری کے پتے۔ بھنڈی کے پتے۔ اٹنگن۔ جل بیل (لٹوکری)۔ بچھوا گھاس۔ مشک دانہ ۔

دابق:

دابق کا مطلب ہے چپکنے والی۔ (Sticky)

دابق اس دوائی کو کہتے ہیں جو لیسدار ہونے  کی وجہ سے جسم سے چپک جاتی ہے۔ جیسے:

 صمغ عربی۔ شہد۔ سریش۔ لاکھ دانہ۔

دافع خمار:

دافع خمار کا مطلب ہے نشہ دور کرنے والی۔ (Anti-Narcotic)

دافع خمار وہ دوائی کہلاتی ہے جو تبخیر کو روک کر خمار اور نشہ کو دور کر دیتی ہے۔ جیسے :

شربت قند۔ تما ترش اور چھینک لانے والی چیزیں۔املی۔ آلو بخارا۔ گلاب کا پھول سونگھنا۔ کھٹا انار۔ عرق لیموں۔ عرق گلاب۔

رادع۔ مخالف جاذب

رادع کا مطلب ہے لوٹا دینے والی (Deterrent)

رادع اوپر ذکر ہونے والے جاذب کا برعکس ہے، یعنی وہ دوا جو مادے کو ہٹانے،روکنے  اور لوٹا دینے والی ہو۔ جیسے:

 ریٹھہ۔ گل ارمنی۔ کلونچی۔ کالی زیری۔ کچلے کا لیپ۔ سرکہ۔ صندل۔ سماق۔ پوست۔ رسوت۔   مکو۔ اسپغول۔ گلنار۔ چھالیا۔ دھنیا۔ خطمی۔ گل مختوم۔ السی۔ ملتانی مٹی۔ گیرو۔ املتاس۔ گوگل۔

عاصر

عاصر کا مطلب ہے نچوڑنے والی۔ (Squeezing)

وہ دوا جو انتہائی قابض اور کسیلے پن والی ہو، اپنے اس وصف کی وجہ سے  عضو کو سمیٹی اور پتلی رطوبت کو نچوڑتی ہو، جیسے:

 جامن کی گٹھلی کا پوست۔تخم املی۔ ہڑ۔ آنولہ۔ ببول کی پھلی۔ انار کے چھلکے۔

غَسال

غَسّال کا مطلب ہے دھونے والی۔ (Lotions, Washing)

غسال ان ادویات کو کہا جاتا ہے جو سیال ہونے کی وجہ سے اخلاط کو سطح عضو سے دھو دیتی ہیں۔ جیسے:

 نیم گرم پانی۔ آش جو۔ شہد ملا ہوا پانی۔

قاتل

قاتل یعنی مارنے والی۔ (Pernicious)

قاتل وہ ادویات کہلاتی ہیں جو اپنی ضد اور مخالفت کی وجہ سے ہر تین ارواح (روح نفسانی، روح، طبعی، روح حیوانی )کو فنا کرتی ہے، جیسے:

سنکھیا۔ ہیرا۔ پارہ۔ شیر کی مونچھ کے بال۔ افیون۔ فرفیون۔ کچلہ۔ دھتورہ۔ ہڑتال۔

قاتل دیدان

قاتل دیدان کا مطلب ہے پیٹ کے کیڑے مارنے والی۔ (Vermicide)

دیدان پیٹ کے کیڑوں کو کہا جاتا ہے، قاتل دیدان سے مراد وہ ادویات ہیں جو پیٹ کے کیڑوں کو مار دیتی ہیں جیسے:

پوست بیخ انار۔ شفتالو کے پتے۔ صابن دیسی۔ ورمنہ ترکی۔ ترمس۔برگ شریفہ سبز۔ بابڑنگ کابلی۔ کلونجی۔ پودینہ کوہی۔ زوفائے خشک۔ پلاس پاپڑا۔

قابض

قابض کا مطلب ہے سکیڑنے والی، بند کرنے والی۔ (Astringent)

یعنی قبض پیدا کرنے والی ادویات، جو بہت زیادہ بوجھل، یابہت زیادہ خشک ہونے کے عضو کو سمیٹ کر قبض پیدا کرتی ہیں، اور عضو کی نالیوں میں  مواد کو روکتی ہیں۔ جیسے:

جامن کی گٹھلی۔ انبہ کی گٹھلی۔ چنا۔ چاول۔ مائیں۔ مازو۔ افیون۔ مصطگی۔ کنوچہ بریاں۔ترنج۔ ترمس۔ پنسلوچن۔ دم الاخوین۔ گلنار۔ سماق۔ مسور۔ بانگ۔ جرانکس۔ سنگدانہ مرغ۔ جفت بلوط۔ پستہ کا چھلکا۔ زرشک تخم مورد۔ لوبیہ۔

قاشر

قاشر کا معنی ہے چھلکا اتارنے والی۔ (Peeler)

وہ دوا، جو اپنی قوت جلائیہ سے عضو کے اجزائے فاسدہ کو دور کرے اور جلا بخشے، ۔ مثلا:

کٹ۔زراوند۔ جوبریاں۔ کالے تل۔ خشخاش۔ چھیپ اور جھائیں کے دفع کرنے کے لیے جو دوائیں مستعمل ہیں وہ قاشر ہیں۔

کاوی

کاوی یعنی کاسٹک ۔داغ دینے والی۔ (Caustic)

کاوی ان چیزوں کو کہا جاتا ہے  جو اپنی تیزی اور سوزش کی وجہ سے جلد کو جلائے اور داغ ڈالے جیسے:

تیزاب۔ چونا۔ سفیدہ۔ ادرک۔ لہسن۔  رائی۔ ہالون۔

کاسر الریاح

کاسر ریاح کا مطلب ہے ریح یعنی ہوا اور گیس کو توڑنے والی۔ (Carminative)

کاسر ریاح ان ادویات کو کہا جاتا ہے جن میں قوت حرارت بہت زیادہ ہوتی ہے اور وہ اسی قوت حرات سے  غلیظ گیسوں کوپتلا  کرکے دفع کردیتی ہیں۔ مثلا:

پودینہ۔ اجوائن۔ مکو۔ زیرہ۔ چوکا۔ تج۔ سیاہ مرچ۔ نوشادر۔ زرنباد۔ رائی۔ ہرڑ کا مربہ۔ زیرہ سیاہ۔سداب۔ ادرک۔ سونٹھ۔ نمک سیاہ۔ بیج کرفس۔ جاوتری۔ سونف۔

لاذع

لاذع کا معنی ہے خراش کرنے والی۔ (Irritant, Itchy)

لاذغ ان چیزوں کو کہا جاتا ہے جن میں قوت نفوذ بہت تیز ہوتی ہے، اور اسی تیزی کی وجہ سے وہ عضو میں سوزش اور خراش پیدا کردیتی ہیں۔ جیسے:

 سرکہ۔ لیموں۔ نمک شور۔ رائی۔ جامن کا تیزاب۔

لازج

لازج یعنی چپکنے والی۔ (adhesive)

لازج ان چیزوں کو کہا جاتا ہے جن میں لیس اور خشکی دونوں ہوتی ہیں جس کی وجہ سے وہ عضو سے چپک جاتی ہیں۔ جیسے:

 خبازی۔ بعض قسم کی مچھلیاں۔ مسور۔ چاول۔ موگرہ۔ گوند وغیرہ۔

حابس دم

حابس دم کا مطلب ہے خون کو روکنے والی۔ (Styptic)

یعنی وہ دوائی جس میں خشکی پائی جاتی ہو اور وہ  اپنی خشکی کی وجہ سے رگوں میں سُدہ پیدا کرکےخون کے بہاؤ کو روک دے۔ اسی طرح  زخموں  پر کھرنڈ لا کر خون جاری ہونے کو بند کرنے والی ہو۔ جیسے:

کتھ۔ غاریقون۔ مازو۔ ریشہ۔ برگد۔ چھوٹی مائیں۔ کنگھی بوٹی۔ گل ارمنی۔ جوز السرو۔ مقل۔ شادنج عدسی۔ رسوت۔ کافور۔ بیخ انجبار۔ گل مختوم۔ سنگ جراح۔ مصطگی۔ خشک دھنیا۔ زرشک، دم الاخوین۔ گیرو۔ جفت بلوط۔ سرمہ۔ بارتنگ۔ کہربا۔ پتنگ لکڑ۔ نشاستہ۔ اجوائن خراسانی۔ گلنار۔ کندر۔

مبرد

مبرد کا معنی ہے سردی پہنچانے والی۔ (Refrigerant)

وہ دوا جو خود انتہائی ٹھنڈی اور سرد ہونے کی وجہ سے سردی پہنچاتی ہے، جیسے: صندل۔ آلوبخارا۔ افیون۔ کاسنی۔ کاہو۔ نیلوفر۔ گڑہل کے پھول۔ خوشبودار مٹی۔

مبھی

مُبہی  کا معنی ہے قوت باہ پیدا کرنے والی۔ (Aphrodisiac)

ایسی غذا، یا ایسی دوا جو جنسی خواہش کو ابھارتی ہے، اور قوت باہ پیدا کرتی ہے،  جیسے:

سیاہ تل۔ جاوتری۔ شلجم۔، گوشت بکری۔ کتیرا۔ تودری زرد۔ تودری سفید۔ کھوپرا۔ تخم پیاز۔دار چینی۔ مغزبادام۔ مغزاخروت۔ مغز چلغوزہ۔ باقلا لوبیہ۔ ابرق۔ پنیر مایہ شتر۔ ہینگ۔ پستہ۔ خصیۃ الثعلب۔ تج۔ کوٹھ۔ چنا۔ سقنقور۔ ستاور۔ گوکھرو۔ بہمن سرخ۔ بہمن سفید۔ موصلی سفید۔ موصلی سیاہ ۔تخم ترب۔ موصلہ سنبھل۔ مشک۔ موتی۔ عنبر۔ سونٹھ۔ کھجور۔ چھوہارا۔ تیتر۔ بٹیر۔ مرغ۔ بیضہ نیم برشت (کچا پکا انڈا، یعنی آدھا پکا ہوا انڈہ)۔ ماہی روبیاں۔ تخم کونچ۔ انگور۔ تخم گاجر۔

مجفف

مَجَفِّف  کا مطلب ہے خشکی پیدا کرنے والا۔(Desiccative)

وہ دوا  جس میں خشک کرنے کی صلاحیت ہو،جس کی وجہ سے  اعضاء کی رطوبت یا زخم کو خشک کر دے۔ جیسے:

 پھٹکڑی۔ سیپی جلی ہوئی۔ چھوہارے کی گٹھلی جلی ہوئی۔ برگ مدار۔ سندورس۔ کاغذ جلا ہوا۔ ٹاٹ جلا ہوا۔ چھالیہ۔ کتھ۔ سنگ جراحت۔ پوست انار۔ پارہ۔ چونا بجھا ہوا۔ توتیا۔ انزروت۔ مردار سنگ۔ ایلوا۔

مجمّد

مُجَمِّد  کا مطلب ہے جما دینے والی۔( coagulant)

وہ ادویات جو انتہائی سرد ہوں اور ان میں قوت قابضہ پائی جاتی ہو، چنانچہ وہ  اپنی سردی اور قوت قابضہ کے اثر سے خلطوں اور رطوبتوں کو جما دے۔ جیسے: گوند کتیرا۔ نشاستہ۔ اجوائن خراسانی۔ گیرو۔ موم۔ صمغ عربی ۔ لہسوڑا۔

محرق

محرق یعنی جلانے والی۔ (Corrosive, burning)

محرق ان ادویات کو کہا جاتا ہے جو بہت زیادہ گرم ہوتی ہیں اور اپنی اس قوت گرمی کے نفوذ کی وجہ سے عضو کی رطوبات کو جلا کر ختم کردیتی ہیں۔ مثلا: گندھک۔ ہڑتال۔ فرفیون۔ زنگار۔ توتیا۔ چونا۔ تیزاب۔ نمک۔ شورہ۔ نورہ۔ آگ۔ مدار کا دودھ۔ ہینگ۔

محلمات ردیہ

یعنی ایسی دوا یا غذا جو پریشان کن خواب دکھانے کا سبب بنے۔( Disturbing dreamer)

وہ دوا جو تبخیر اور گیس پیدا کرتی ہے اور اپنی قوت تبخیر کے ذریعے دماغ کو پریشان کرتی ہے اور نیند کی حالت  میں متوحش اور پریشان کن خواب دکھاتی ہے۔ جیسے:  شراب کی کثرت۔ کچاپیاز۔ آلو۔ بینگن۔ گندنا۔ باقلا۔ لوبیا۔ گوبھی۔ مسور۔

محلل

محلل کا مطلب ہے تحلیل کرنے والی۔ (Resolvent)

محلل ان ادویات کو کہا جاتا ہے جن میں گرمی زیادہ ہوتی ہے اور اس گرمی کی وجہ سے ان میں قوت تحلیل پیدا ہوجاتی ہے چنانچہ وہ اپنی قوت تحلیل اور حرارت کے باعث عضو کی لیس دار اخلاط کو بخارات بنا کر فنا کر دیتی ہیں۔ جیسے:

لاذن۔ السی۔ ہلدی۔ مکو۔ افسنتین رومی۔ برگ جھاو۔ پودینہ کوہی۔ کریلہ۔ اشق۔ پیاز دشتی۔ جاو شیر۔ گودا املتاس۔ زراوند۔ دونامروا۔ جندبیدستر۔ ناخونہ(اکلیل الملک)۔ برگ چنبیلی۔ نرگس بستانی۔ بھٹوانس یعنی دھوئیں کی سیاہی۔ بابونہ۔ خطمی۔ عنبر بید۔ سداب۔ کیکڑا۔ سویہ یعنی ژبت۔ انجیر۔ زعفران۔ مکوئے سبز۔ مقل۔ کسوندی۔ بیخ کبر۔ پرسیاو شان۔ تگر۔ ارنڈ۔ غافث۔ زفت۔ صمغ بطم۔ حاشا۔ ترمس۔ رائی۔ ہلدی۔ گل خیرہ۔ دارچینی۔

مُحمر

مُحَمِّر یعنی سرخ کرنے والی۔ (Rubefacient)

وہ ادویات جن میں قوت جاذبہ بہت زیادہ ہوتی ہے اور بوجہ اپنی گرمی اور قوت جاذبہ خون کو عضو کی طرف کھینچ لائے اور عضو کو سرخ کردے جیسے:

چال مونگرا۔ رائی۔ پودینہ۔ گل لالہ۔ نارنگی کے چھلکے۔ چھڑیلہ۔ بالچھڑ۔ جرانکس (اذخر)۔ دارچینی۔ زعفران۔ حسن یوسف۔ ہینگ۔

مخدر

مُخدِّر  یعنی بے حس کر دینے والی۔ (Anesthetic)

وہ ادویات جو انتہائی سردی اور خشکی رکھتی ہیں، جس کی وجہ سے ان میں قوت قبض پیدا ہو جاتی ہے، چنانچہ اپنی اسی قوت قبض، سردی، خشکی کی وجہ سے مسامات اور نالیوں کو کثیف(گدلا اور گاڑھا) کرکے روحِ نفسانی کے نفوذ کو روک دیتی ہیں  اور عضو کو بے حس کر ددیتی ہیں۔ جیسے:

 افیون۔ اسپند۔ کچلہ۔ برگ تمباکو۔ تخم تمباکو۔ کندر۔ شوکران۔ لونگ۔ دھتورہ۔ اجوائن خراسانی۔ کاکنچ۔ لفاح ۔ کوکین۔

مخرجات جنین

یعنی بچے کو ماں کے پیٹ سے نکالنے والی۔ (Ecbolic)

یعنی وہ ادویات جن سے عضلات رحم کو تحریک ہوتی ہے اور اس سے بچہ کی پیدائش میں مدد ملتی ہے۔ یہ ادویہ رحم کو سکیڑ کر حمل کو قبل از وقت ساقط کر دیتی ہیں۔ اس لیے ان کو مسقطات حمل بھی کہتے ہیں۔ مثلا:

سبز حنا یا بانس کے پتوں یا املتاس کے چھلکے کو جوش دے کر پینا۔ تیز مسہلات ۔ روغن بیدابخیر۔ کونین ۔ ارگٹ۔ زراوند۔ السی۔ تج۔ ابہل ۔ بندال۔ بوزیدان۔ پرسیاؤ شان۔ کٹکی ۔ فرفیون۔ رتن جوت۔ کلونجی کو پیس کر پینا۔ بنولہ کی جڑ۔

مخشن

مخشن یعنی کھردرا پن پیدا کرنے والی۔ (Roughening)

وہ دوا جو اپنی قوت قبض و خشکی کے عضو کی ظاہری سطح کو کھردرا کردے۔ جیسے: اکلیل الملک۔ رائی۔ آملہ۔ جامن کی گٹھلی۔ تخم املی۔ بھلاواں۔ آم کی گٹھلی۔

مدر بول

مدر بول یعنی پیشاب کو جاری کرنے والی۔ (Diuretic)

وہ دوا جو گرمی یا سردی کی وجہ سے پیشاب کی راہ سے مادہ کو دفع کرتی ہے، اور پیشاب کو جاری کر دیتی ہے۔ جیسے:

تخم کھیرا۔ ککڑی۔ خرپزہ۔ گل خیرو۔ تخم کاسنی۔ کاکنج۔ تخم چولائی۔ تخم خرفہ۔ لوکی کا پانی۔ کھیرے کا پانی۔ تربوز کا پانی۔ کاسنی کے بیج۔ آش جو۔ عرق لیموں۔ ثردہ۔ گھوکھرو وغیرہ ۔(یہ سب سرد مدرات ہیں)۔

جبکہ : تخم گاجر۔ پرسیاؤشاں۔ بالچھڑ۔ املتاس۔ انیسون۔ شبث۔ تخم کرفس۔ سونف۔ کباب چینی۔ زعفران۔ برنجاسف۔ تج۔ خشک زوفا۔ تتلی(سداب)۔ تگر۔ اجمود(کرفس)۔ اجوائن دیسی۔ تخم خبازی۔ پودینہ۔ دوقومی۔ کلونجی۔ اگر۔ بلسان وغیرہ ۔ (یہ سب گرم مدرات ہیں)۔

مدر حیض

مدر حیض یعنی حیض کو جاری کرنے والی۔ (Emmenagogue)

اپنی لطافت اور گرمی کی وجہ سے  جمے ہوئے خون  کو معتدل کرکے پگھلا کر نکال دیتی ہیں۔ بندش حیض میں ان ادویات کو استعمال کرایا جاتا ہے۔مثلا:

جاؤشیر۔ زعفران۔ بابونہ۔ پودینہ۔ تتلی(سداب)۔ املتاس کے چھلکے۔ ناگرموتھ۔ اجمود۔ نمام(کالی تلسی)۔ ایلوا۔ چھڑیلہ۔ اجوائن دیسی۔  تج۔ کباب چینی۔ پرسیاؤشاں۔ کلونجی۔ کنکول مرچ۔ جنگلی تلسی۔ قسط شیریں۔ اسپند۔ پکھان بید۔ جندبیدستر۔ ابہل۔ چنے کا زلال۔ مشکطر امشیع۔ کلتھی۔ عود صلیب۔ فراسیون (گندناپہاڑی) وغیرہ۔

مولد شیر

یعنی دودھ پیدا کرنے والی۔ (Galactagogue)

وہ ادویات جن میں رطوبت بہت ہوتی ہے یا رطوبت پیدا کرتی ہیں چنانچہ اپنی رطوبت فضلیہ کی وجہ سے دودھ پیدا کرتی ہیں۔ جیسے:

موصلی سیاہ۔ موصلی سفید۔ سفید تل۔ ستاور۔ بادیان۔ گوند کیکر۔ صمغ عربی۔ گوند کتیرا۔ آلو۔ تودری زرد۔ بداری قند۔ تخم اسپست۔

مُدمل

مُدمِّل یعنی زخم کو بھرنے والی۔( Cicatrizing)

وہ ادویات جو زخموں کی رطوبت کو خشک کرکے بھرتی ہیں۔ زخم کو بھرنے والی دوا، زخم کو خشک کرنے والی دوا جیسے:

سرمہ سنگ جراح۔ گوند کتیرا۔ آلو۔ ایلوا۔ لائی۔ اسنج۔ موم سفید۔ زراوند۔ مردارسنگ۔ گائے کا گھی۔ دم الاخوین۔ گل ارمنی۔ رال۔ ملتانی مٹی۔ نیم کا تیل۔ شیرہ بارتنگ۔ سفیدہ کاشغری۔

مرخی

مرخی یعنی نرم کرنے والی۔ (Emollient)

وہ دوا جو اپنی قوت حرارت و رطوبت کے باعث جلد کو نرم اور مسامات کو فراخ کرکے عضو کو ڈھیلا کر دیتی ہے۔ جیسے:

 السی۔ خطمی۔ سردا۔ کرم کلہ کے پتے۔ بطخ کا پتہ۔ روغن گل۔ بہدانہ۔ اکلیل الملک۔ گرم پانی۔

مرطب

مُرطِّب یعنی تر کرنے والی۔ (Emollient)

وہ دوا جو قوی رطوبت کے باعث اعضاء کو تر کر دیتی ہے۔ جیسے:

مغز کدو شیریں۔ بادام۔ تربوز۔ خربوزہ۔ لوکی۔ اسپغول۔ گائے کا دودھ۔ موصلی۔ گوند کتیرا۔ کھیرا۔ توری۔ روغن کدو۔ روغن کاہو۔ روغن بادام۔ گھی وغیرہ۔

مرقق

مُرقِّق  یعنی پتلا کرنے والی۔ (Diluent)

وہ دوا جو اپنی حرارت اور رطوبت کی وجہ سے اخلاط کورقیق اور  پتلا کرتی ہے۔ جیسے: شہد۔ سرکہ۔ شکر۔ پودینہ کا عرق۔

مزلق

مزلق یعنی پھسلانے والی۔ (Lubricant)

وہ لعاب دار دوا جو باطنی عضو کی اندرونی سطح کو تر اور چکنا کرکے اندرونی خلطی مادہ کو خارج کر دے، جیسے:

آلوبخارا۔ املی پرانی۔ تخم ریحان۔ سدا سہاگن۔ بہدانہ شیریں۔ ترنجبین۔ گوندنی پختہ۔ سپستان۔ تخم خبازی۔

مسدد

مُسدِّد  یعنی سُدہ پیدا کرنے والی۔ (Obstruent)

سدہ کا مطلب ہوتا ہے گانٹھ لگانا یا رکاوٹ ڈالنا۔ مسدد وہ دوا ہے جو اپنی خشکی اور کثافت اور گاڑھے پن  کی وجہ سے مسامات و مجاری  یعنی نالیوں اور رگوں کو بند کردے، جیسے: جامن کی گری۔ خشخاش سفید۔ اسپغول کوٹا ہوا۔ اجوائن۔ سورنجاں تلخ۔ کیلا خام۔ املی کے بیج۔

مسکر

مُسکر یعنی نشہ لانے والی۔ (Narcotic)

بادام تلخ۔ زعفران۔ جاوتری۔ چھڑیلہ۔ بھنگ۔ بُن (حب البطم)۔ جائفل۔ مہوا۔

مسکن

مُسکن یعنی درد کو تسکین دینے والی۔ (Sedative)

وہ دوا جو اخلاط کی حرارت اور جوش کو ساکن کرے جیسے: افیون۔ بطخ کی چربی۔ لفاح۔ تمباکو۔ شوکران۔ مور کا پتہ۔ انڈے کی سفیدی۔ نشاستہ۔ گوند کتیرا۔ خشک دھنیا۔ سمندر سکھ۔ گوند کیکر۔ اجوائن خراسانی۔ سداسہاگن۔ برگ ترشہ(چوکا)۔

مسخن

مسخن یعنی گرم کرنے والی(Heated)

وہ دوا جو حرارت پیدا کرے، اور اپنی گرمی کے اثرات کی وجہ سے متعلقہ فوائد فراہم کرے۔

منوم

منوم یعنی نیند لانے والی۔ (Hypnotics)

جیسے زعفران۔ سویا۔ بنفشہ۔ سبز دھنیا۔ کاہو۔ سیب۔ تلسی۔ گل لالہ۔ پودینہ کوہی۔ روغن نیلوفر۔ بادام۔ خشخاش۔

مسہر

مُسَہر  یعنی نیند کا غلبہ دور کرنے والی۔ (Agrynotic, Sleep-killer)

وہ چیزیں جن میں خشکی یا تیزی یا سوزش پائی جاتی ہے جس کے سبب وہ نیند کا غلبہ دور کرتی ہیں۔ جیسے:

قہوہ، چائے، سرکہ، رائی، کالی مرچ، نمک، ایارج فیقرا، کافور سونگھنا، لونگ، پودینہ۔

مسمن

مُسَمِّن یعنی بدن کو موٹا کرنے والی۔(Fattening)

وہ  دوا جو کثیر الغذا اور رطوبات سے بھرپور ہونے کی وجہ سے بدن کو موٹا کرتی ہو، جیسے:

 توت شیریں، تل سفید ستاور۔چاول ۔خوب کلاں ۔ آم۔ مکھن۔ دودھ۔ خشخاش سفید۔ کیلا۔ شراب۔ بیر۔ آرد سنگھاڑا۔ چچینڈا۔ شکر۔ نخود۔ حب الققل۔ساگودانہ۔

مسہل صفرا

یعنی صفرا کو بذریعہ دست خارج کرنے والی۔ (Cholagogue) کول اگوگ

مسہل کا مطلب ہے سہولت پیدا کرنے والی، طب کی اصطلاح میں دست آور ادویات کو مسہل کہا جاتا ہے۔ مسہل صفرا کا مطلب ہے وہ ادویات جو بذریعہ دست جسم سے صفرا کو خارج کر دیں۔جیسے:

آب برگ پالک سبز۔ آب برگ کاسنی سبز۔ ایلوا۔ عشق پیچہ(لبلاب)۔ آلو بخارا۔ املی پرانی۔ تخم شاہ پسند۔ گل بنفشہ۔ افسنتین۔ سنامکی۔ترنجبین۔ شیر خشت۔ سقمونیا۔ آکاش بیل۔ املتاس کی پھلی۔ پوست ہلیلہ زرد(زرد ہریڑ کا چھلکا) ۔شربت ورد۔

مسہلات بلغم

یعنی بلغم کو بذریعہ دست خارج کرنے والی۔ (Phlegm agogue)

وہ ادویات جو جسم سے بلغم کو دست کے ذریعہ خارج کر دیتی ہیں۔ جیسے:

جمال گوٹہ مدبر۔ شکر سرخ۔ اسطوخودوس۔ افتیمون۔ سناء مکی۔ آکاس بیل۔ بسفائج۔ آنولہ۔ بالنگو۔ کابلی ہریڑ(ہلیلہ سیاہ) غاریقون۔ ریوند خطائی۔ ایارج فیقرا۔ حجر لاجورد۔ سنگ ارمنی۔ دھارد۔

مشتھی

مُشتہی یعنی بھوک پیدا کرنے والی۔(Appetizer)

مشتہی ان دواؤں یا غذاؤں کو کہا جاتا ہے جو بھوک بڑھاتی ہیں جیسے:

سرکہ۔ سفرجل۔ سرکہ زرشک۔ لیموں کا چھلکا۔ آڑو۔ عرق لیموں۔ چھلکا ترنج۔ سکنجبین۔کالی مرچ۔ مصطگی۔ پودینہ ۔ زیرہ۔ سونٹھ۔ اجوائن۔ زرشک۔ خولنجاں۔ سرد پانی۔ الائچی خورد۔ اونٹنی کا دودھ۔

مصدع

مُصَدِّع  یعنی درد سر پیدا کرنے والی۔ (Cephalalgic)

یہ ادویات ہیں جن میں تبخیر بہت زیادہ ہوتی ہے، جو سر درد کا باعث بنتی ہے۔ جیسے:

لوبان۔ گندنا۔ سویا۔ لہسن۔ پیاز۔ مسور۔ اظفار الطیب۔ اجوائن خراسانی۔ میتھی۔ السی۔ خاکسی۔ تنج۔ توت۔ پالک کا ساگ۔ گل خیرو۔ جرانکس(اذخر)۔ مولی۔ بینگن۔ رام تلسی۔ بلوط۔ جوزبوا۔ گل انار۔ چکور کا گوشت۔

مصلح

مُصلح یعنی اصلاح کرنے والی۔ (Corrigent)

وہ دوا یا غذا جو کسی دوسری دوا یا غذا کا ضرر اور نقصان ختم کردے۔یہ عام طور پر وہ چیزیں ہوتی ہیں جو متضاد خواص رکھتی ہیں، جیسے سناء کے استعمال سے الٹی آنے لگتی ہے اور پیٹ میں سخت مروڑ پیدا ہوتی ہے، لہذا بغرض اصلاح اس کے ساتھ ل سرخ یا انیسوں ملا دیتے ہیں۔ اسی طرح تخم حنظل (تمہ کے بیج) کے ساتھ گوند کیکر یا کتیرا بطور مصؒح شامل کر لیا جاتا ہے۔

مضعف باہ

مضعف باہ کا معنی ہے قوت باہ کو ضعیف اور کمزور کرنے والی۔ (Anti Aphrodisiac)

وہ ادویات جو قوت باہ کو ضرر دیتی ہیں جیسے: دھنیا۔ مکو۔ بیخ نیلوفر۔ عناب۔ جڑ بنفشہ۔ رام تلسی۔ کاسنی۔ کاہو۔ کالی خشخاژ۔ سنبھالو کے تخم۔ لیموں۔ نمک۔ ٹھنڈا پانی۔ چوکا۔ کافور۔ بڑھل۔ املی۔ آلو بخارا۔

مطفی

مطفی یعنی گرمی اور تیزی کو ختم کرنے والی۔ (Refrigerant)

یہ وہ ادویات ہیں جن میں سردی اور رطوبت دونوں زیادہ ہوتی ہیں جس کی وجہ سے یہ گرمی اور سوزش کو ختم کرتی ہیں۔ جیسے:

کافور۔ کاہو۔ نیلوفر۔ مغزکدو۔ کائی۔ نارجیل دریائی۔ آلوبخارا۔ کاسنی۔ برف۔ پالک۔ آب کھیرا۔ آب کدو۔ سرد پانی۔

مصفیات خون

مُصَفِّیاتِ خون  یعنی خون کو صاف کرنے والی۔ (Blood Purifier)

وہ دوائیں جو بگڑے ہوئے خون کو اس کی اصلی حالت پر لے آتی ہیں۔ اکثرسوداوی امراض کی وجہ سے خون گاڑھا ہو جاتا ہے، یا گرمی سے سڑ جاتا ہے، ایسی صورت میں یہ ادویات خون کی اصلاح کرتی ہیں۔ جیسے:

فالسہ کے پتے۔ شہد۔ گندھک۔ برم ڈنڈی۔ ہرن کھری۔ نیم کے پتے اور نیم کی چھال۔ برادہ آبنوس۔ برادہ شیشم اور شیشم کی چھال۔ منڈی بوٹی۔ حنا کے پتے۔ بکائن کے پتے۔ گل حنا۔ گل نیم۔ صندل۔ شاہترہ۔ چوب چینی۔ چرائتہ۔ تاڑی۔ سرس۔ سم الفار۔ سہدیوی۔ چھال کچنال۔ عشبہ۔ سرپھوکہ۔ نیل گنٹھی۔ نگندبابری۔ بکن بوٹی ۔ عناب۔

معرق

مُعَرِّق  یعنی پسینہ لانے والی۔ (Diaphoretic)

یعنی وہ چیزیں جو اپنی قوت تاثیر سے مسامات کے ذریعے رطوبات کو خارج کرتی ہیں اور پسینہ لاتی ہیں۔ جیسے:

پانی پینا۔ بے حد گرمی۔ گرم کپڑے پہننا۔ خوب کلاں ۔ کافور۔ لوبان کوڑیا۔ چائے۔ اور تمام مدرات بوٹیاں۔

معطس

مُعَطِّس  یعنی چھینک لانے والی۔ (Errhine)

یعنی وہ ادویات جو اپنی قوت نفوذ سے دماغ کے مواد کو حرکت دے کر بذریعہ چھینک خارج کرے۔جیسے:

تمباکو۔ نک چھکنی۔ شیرہ بادام تلخ۔ نوشادر۔ ریٹھ۔ دونامروا۔ سونٹھ۔ کشمیر پٹھ (برگ تبت)۔ کنیر کا پھول۔ تخم سرس۔ بارکٹائی خرد۔

معطش

مُعَطِّش  یعنی پیاس لگانے والی۔ (Thirst Stimulant)

وہ دوائیں اور غذائیں جو اپنی گرمی، خشکی اور تیزی کی وجہ سے پیاس لگاتی ہیں۔ جیسے:

تمام گرم خشک چیزیں۔ گوشت۔ مچھلی۔ چنا۔ مرچ۔ نمک۔ دھوپ میں چلنا پھرنا، گرمی۔

مغری

مُغَرِّی  یعنی چپک جانے والی۔ (Glutinous)

وہ دوائیں اور غذائیں جو لیسدار ہونے کی وجہ سے رگوں اور آنتوں میں چپک کر سُدہ پیدا کرتی ہیں۔ جیسے:

گوند کتیرا۔ چونا بجھا ہوا۔ سنگ جراحت۔ کنوچہ۔ برگ گاؤزبان۔ انڈے کی سفیدی۔ سریشم ماہی۔ بھنڈی۔ بہدانہ۔اسپغول

مغلظ منی

یعنی مادہ تولید منی کو گاڑھا کرنے والی۔( semen thickener)

وہ ادویات اور غذائیں جو منی کو گاڑھا کرتی ہیں، جیسے:

بہمن۔ تودری۔ آرد سنگھاڑا۔ موصلی سیاہ و سفید۔ گوشت نیم بریاں۔ بادی سبزیاں۔ سبوس اسپغول۔ بوپھلی۔ کمرکس۔ تال مکھانا۔ کنول گٹہ۔ مغز خستہ آم۔ گیاہ چینی۔ بیج بند۔ جامن کی گٹھلی۔ سنبھل کا موسلا۔ قلعی۔ مایہ شتر اعرابی۔ املی کے بیج۔

مفتت حصات

مُفَتِّت حصات کا مطلب ہے پتھری کو توڑنے والی۔ (Lithontriptic)

وہ چیزیں جو پتھری کو توڑتی ہیں، جیسے:

سنگ سرماہی۔ بچھو کی راکھ۔ گوند۔ دوقو۔ سنگ مرارہ۔ اسگند بالا۔ تلسی۔ آلو۔ تخم خربوزہ۔ پرسیاؤشاں۔گوکھرو۔ سونف۔ کڑوابادام۔ سلاجیت۔ کنڈل۔ نخود سیاہ۔ کلتھی۔ گول داؤدی۔ برنا۔ آب برگ لونیاسبز۔ تخم ترہ تیزک۔ اظفار الطیب۔ سنگ یہود۔ ناگرموتھ۔ جوکھار۔ اندرجو۔

مفتح

مفتح کا معنی ہے کھولنے والی۔ (Deobstruent)

مفتح سے مراد وہ دوائیں یا غذائیں ہیں جو بسبب اپنی حرارت کے آنتوں ، رگوں اور مسامات کو کھولتی ہے، جیسے:

مرمکی۔ سونٹھ۔ سداب۔ تخم گاجر۔ ہلیون۔ اجوائن دیسی۔ باد نجبویہ۔ دارچینی۔ جرانکس۔ شاہترہ۔ کاسنی۔ آکاس بیل۔ غاریقون۔ اشنہ۔ کرفس۔ بیخ بادیاں۔ بیخ بنفشہ۔ زیرہ کرمانی۔ دارفلفل۔ برنجاسف۔ تخم کثوث۔ اسپند۔ پکھان بید۔ اجمود۔ بھٹوانس۔ گل غافث۔ سنبل الطیب۔ جاوتری۔ سونف۔ مجیٹھ۔

مفجرات اورام

مفجرات اورام کا مطلب ہے ورم کو پھاڑنے والی۔( Anti-inflammatory)

وہ ادویات جو اپنی حرارت، گرمی اور تیزی کے باعث  پھوڑے یا جلد کو پھاڑ دیتی ہیں۔ جیسے:

ہڑتال۔ کبوتر کی بیٹ۔ سفیدہ کاشغری۔ جنگلی پیاز۔ رتن جوت۔ فرفیون۔ ہیراکسیس۔ چونا۔ سہاگہ۔

مفرح

مفرح کا معنی ہے فرحت اور راحت دینے والی۔ (Exhilarant, Joyful)

وہ دوا یا غذا جو اپنی لطافت کی وجہ سے انسانی طبیعت میں خوشی اور راحت پیدا کرتی ہے اور دل کو طاقت دیتی ہے۔ جیسے:

ورق نقرہ۔ سیپ۔ یشب۔ یاقوت۔ موتی۔ اگر۔ املی۔ انجیر۔ بربسی۔ بالنگو۔ مغزپستہ۔ بہی۔ سیب۔ دارچینی۔ ورق طلا۔ زعفران۔ الائچی۔ ابریشم۔ گل گاؤزبان۔ گل چاندنی۔ گل گڑہل۔ کافور۔ لونگ۔ مشک۔ صندل سفی۔ انار ۔ امرود۔ آملہ۔ ترنج۔ کٹھ۔ بالچھڑ۔ عرق کیوڑہ۔ عرق بید مشک۔ لیموں۔ بسفائج۔ گلاب۔ عطر۔ چنبیلی۔ لاجورد۔ زہرمہرہ خطائی۔ مونگا۔ نیلوفر۔ عنبر۔ بنسلوچن۔

مقرح

مقرح کا معنی ہے زخم ڈالنے والی۔(Vesicant)

وہ چیزیں جو اپنی تیزی اور حرارت کی وجہ سے جسم پر چھالے اور زخم پیدا کرتی ہیں۔جیسے:

فرفیوں۔ شیرمدار۔ چونا۔کبوتر کی بیٹ۔ ہڑتال۔ سہاگہ چوکیہ۔ شیطرج ہندی۔عسل بلادر۔ جل دھنیہ۔ سنکھیا۔ مویزج۔ پلاس پاپڑا۔ زنگار۔

مقئی

مقئی کا مطلب ہے الٹی اور قے لانے والی۔(Emetic)

وہ ادویات یا غذائیں جو اخلاط(بلغم، سودا، صفرا) کو بذریعہ الٹی ابھار کر باہر نکالتی ہیں۔ جیسے:

ترب کے بیج اور سبز پتے۔گرم پانی۔ شبت سبز کے پتوں کا پانی۔ تلخ کدو کا پانی۔ کالادانہ۔ نمک لاہوری۔نک چھکنی۔ کندش۔ اونٹ کٹارا۔ کٹکی۔ میتھی۔

مقویات اعصاب

مقویات اعصاب کا معنی ہے اعصاب اور پٹھوں کو طاقت دینے والی۔(Nerve Tonic)

پٹھوں کو طاقت دینے والی ادویات اور غذائیں، جیسے:

جاؤشیر۔ خرما۔ اسارون۔ جندبیدستر۔ کچلہ حب المنشم۔ قُسط۔ لکڑی۔ میدہ۔ میتھی۔

مقویات بصر

مقویات بصر سے مراد ہے نظر اور بینائی کو طاقت دینے والی۔( Strengthens eyesight)

وہ غذائیں اور دوائیں جو بینائی کو طاقت دیتی ہیں، جیسے:

سرمہ اصفہانی۔ کالی مرچ۔ قرنفل گل دار۔ مرقشیشا۔ پیاز پختہ۔ ابریشم سوختہ۔ چنادی کی سلائی۔ چاندی کا میل۔ پرندوں کے پتہ کا پانی۔ بہیڑہ۔ ہلیلہ۔ آب بادیان سبز۔ زعفران۔ آملہ۔ موتی۔ بادام شیریں۔ عقیق یمنی۔ مرمکی۔ پوست ہلیلہ زرد۔ بھنگرہ۔ مشک دانہ منڈی۔ شہد۔ خالص سیپی جلی ہوئی۔ مامیراں کے پھول کا پاوڈر۔

مقویات جگر

یعنی جگر کو تقویت دینے والی۔( Liver tonic)

وہ غذائیں اور دوائیں جو جگر کو طاقت دیتی ہیں۔ جیسے:

نرکچور۔ غافث۔ تج۔ روغن بلسان۔ ریوند۔ سقمونیا۔ مصطگی۔ پستہ۔ منقی۔ لونگ۔ اظفارالطیب(نکھ)۔ رزشک۔ سنبل رومی۔ جوزبوا۔ کاسنی۔ ناگرموتھ۔ زیرہ سیاہ۔ دارچینی۔ انار دانہ۔ چھڑیلہ۔ تخم کثوث۔افسنتین رومی۔ بارتنگ۔ بادرنجبویہ۔ اسگندھ بالا۔ درونج عقربی۔ اونٹنی کا دودھ۔ الائچی خورد۔

مقویات اسنان ولثہ

یعنی دانتوں اور مسوڑھوں کو طاقت دینے والی۔( Tooth tonic)

کالی مرچ۔ برگ سرس سبز۔ برگ انار سبز۔ سرس کے بیج۔ جلا ہوا تمباکو۔ پھٹگری۔ کباب چینی۔ کوڑی زرد۔ گٹھلی ہلیلہ ۔ زیرہ۔ لوبان۔ ہیرا کسیس۔ مونگے کی جڑ۔ مولسری کی چھال۔ موتی۔ کٹھ۔ کف دریا۔ چندرس۔ بادام کے چھلکے جلے ہوئے۔ مصطگی۔ مائیں خرد وکلاں۔ مازو۔ گلنار۔ عاقرقرحا۔ کات سفید۔ نسپال۔ ناگر موتھ۔ پوست ہلیلہ۔ سپاری کنہ۔ سنگ جراح۔ مسور۔ بھلاواں جلا ہوا۔ تالیستپر۔

مقومات دماغ

دماغ کو طاقت دینے والی۔( Brain Supplements)

وہ غذائیں اور دوائیں جو دماغ کو طاقت دیتی اور تیز کرتی ہیں۔جیسے:

اسطوخودوس۔ مغز تخم تربوز۔ مغز پیٹھا۔ مغزاخروت۔ مغز پستہ۔ مغز بادام۔ اسارون۔ کشنیز(دھنیا خشک) کشمش۔ آملہ۔ برگ بادرنجبویہ۔ مغز پنبہ دانہ۔ منڈی بوتی۔ ہلیلہ سیاہ اور زرد۔ خشخاش سفید اور سیاہ۔ بھیڑ کا دودھ۔ رام تلسی۔ صندل سفید۔ عرق نارنج۔ مغز کدو۔ مغز تخم کاہو۔ دونامروا(مرزنجوش)۔ چنبیلی۔ زعفران۔ گوشت مرغ۔ موتی۔ گلاب۔ ناگرموتھ۔ سونٹھ۔ آملہ۔ بھلانواں۔ بالچھڑ۔ تیتر کا گوشت۔ بالنگو۔ جانوروں کا مغز۔ اگر۔ عود۔ عنبر۔ لونگ۔ مشک۔ مغز فُندق۔

مقویات قلب

یعنی دل کو طاقت دینے والی۔( Heart Supplements)

وہ دوائیں یا غذائیں جو دل کو طاقت اور فرحت دیتی ہیں۔ جیسے:

عقیق یمنی۔  مرجان۔ یاقوت۔ تخم ریحان۔ نیلم محلول۔ آب گزر۔ انگور۔ کیوڑہ۔ تخم بالنگو۔ جندبیدستر۔ جدوار شیریں۔ کس ہندی زرد۔ زبرجد۔ زہر مہرہ۔ یشب انگوری۔ فیروزہ نیشاپوری۔ مربہ گزروپیٹھ۔ انارشیرں۔ امرود۔ آملہ۔ سیب۔ ابریشم۔ گل گڑہل۔ گل لیموں۔ پوست ترنج۔ دارچینی۔ ورق نقرہ۔ ورق طلا۔ لاجورد۔ عود سلیب۔ الائچی۔ مشک۔ عنبر۔ رام تلسی۔ بادرنجبویہ۔ گل مختوم۔ صندل۔ بنسلوچن۔ بہمن سرخ و سفید۔ گاؤزبان۔ درونج عقبی۔ بالچھڑ۔ ناگرموتھ۔ شقاقل۔ اگر۔ نارنج۔ پان۔ جنگلی تلسی۔ بسد۔ نیلوفر۔ موتی۔ صدف۔

مقویات معدہ

یعنی معدہ کو طاقت دینے والی۔ (Stomach tonic)

وہ غذائیں اور دوائیں جو معدہ اور آنتوں کو طاقت دیتی ہیں۔ جیسے:

پودینہ۔ پوست بیرون پستہ۔ گلاب۔ آملہ۔ زرنباد۔ چرائتہ۔ دارچینی۔ ناگرموتھ۔ نرکچور۔ سنگدانہ مرغ(پوٹہ)۔ عود غرقی۔ اگر۔ لونگ۔ الائچی۔ چھڑیلہ۔ تیزپات۔ اناردانہ۔ ہلیلہ ہر قسم۔ بنسلوچن۔ قسط شیریں۔ کندر۔ تج۔ کالی مرچ۔ بالنگو۔ جوزبوا۔ فلفل سفید۔ جامن۔ زیرہ سیاہ۔ انیسوں۔ پیارانگہ۔ جرانکس(اذخر)۔ پوست ترنج۔ فولاد۔ خبث الحدید۔

مقویات باہ

یعنی قوت باہ پیدا کرنے والی۔ (Sexual Tonic)

چلغوزہ۔ پستہ۔ چرونجی۔ خرما۔ بادام۔ فندق۔ پیاز مولی۔ شلجم۔ ثعلب مصری۔ شقاقل مصری۔ خولنجاں۔ بہمن سرخ و سفید۔ موصلی سیاہ و سفید۔ گوکھرو۔ بوزیداں۔ کنجد مقشر۔ ہالون۔ عاقرقرحا۔ تخم گندنا۔ تخم پیاز۔ تخم گاجر۔ سونٹھ۔ چھڑیلہ۔ باقلا۔ خشخاش۔ اندرجو۔ مشک۔ دارچینی۔ تخم کونچ۔ گوشت کنجشک (چڑا)۔ گوشت تیتر۔ ماہی روبیان۔ مچھلی۔ گوشت مرغ۔ بیضہ مرغ۔ گوشت کبوتر۔ گھی۔

ملطف

مُلَطِّف  یعنی لطیف کرنے والی۔ (Demulcent)

وہ دوائیں اور غذائیں جو گاڑھی اخلاط کو پتلا اور نرم کر دیتی ہیں۔ جیسے:

سہاگہ چوکیہ۔ جاوتری۔ بیخ بنفشہ۔ دارچینی۔ مکوخشک۔ عرق مکو۔ عقرقرحا۔ کماذریوس۔ انیسوں۔ بادیاں۔ ناگرموتھ۔ پرسیاؤشاں۔ زوفہ خشک۔ انجیر۔ آب نیشکر۔ تخم کثوث۔ فلفل سیاہ۔ بابونہ۔ ابریشم مقرض۔ صعتر۔ سرکہ۔ جرانکس۔ تخم اٹنگن۔ عناب۔ شورہ۔ کڑ(قرطم)۔ پیاز رائی۔ اوقیل۔ سکبینج۔ جندبیدستر۔ برنجاسف۔ تودری۔ سونٹھ۔ زیرہ سفید۔

ملینات بطن

یعنی پیٹ کو نرم کرنے والی۔ (Laxative)

وہ دوا یا غذا جس کے کھانے سے قبض دور ہو جائے، پیٹ نرم ہو جائے اور پاخانہ کھل کر آئے۔ جیسے:

سناء مکی۔ عرق سونف۔ گلقند۔ چرونجی۔ ساگ خرفہ۔ اکلیل الملک۔ تخم کثوث۔ مولی۔ کرنب(کرم کلہ)۔ مغذبنولہ۔ گنے کا رس۔ شفتالو۔ آم۔ کریلہ۔ کشمش۔ خربوزہ۔ مربہ ہلیلہ۔ روغن بادام۔ بکری و بھیڑ کا دودھ۔ ترنجبین۔ املی۔ پرول۔ چقندر۔ قند۔ شہد۔ گڑ۔ گلاب۔ آلو بخارہ۔آلوچہ۔ پلاس پاپڑہ۔ شٰر خشت خوبانی۔ کلتھی۔

ممسک

ممسک یعنی روکنے والی۔( Ejaculatory inhibitor)

یعنی وہ دوا یا غذا جس میں خشکی گرمی ہو جس کے باعث وہ منی کو روک دے اور سرعت انزال یعنی جلد انزال نہ ہونے دے۔ جیسے:

اجوائن خراسانی۔ جوزبوا۔ بیر بہوٹی۔ گوگل۔ افیون۔ دھتورہ۔ بھٹ کٹیا۔ لونگ۔ کالی مرچ۔ مشک۔ دارچینی۔ سونٹھ۔ ببول کے پھول۔ بیخ کنیر۔ موچرس۔ گوماں کا پھل اور بیج۔ زعفران۔ مصطگی۔ جاوتری۔ سمندرسوکھ۔ عاقرقرحا۔ کچلہ مدبر۔ اسپند۔ تخم ریحان۔ اٹنگن۔

ملذذ

ملذّذ یعنی لذت دینے والی۔ (Delicious)

وہ دوا ئیں یا غذائیں جو جماع اور ہمبستری کے وقت لذت دیتی ہیں۔جیسے:

عاقرقرحا، کبابہ۔ دارچینی۔ لونگ۔ بیربہوٹی۔ منقی۔ سونٹھ۔ سلارس۔ پتہ مرغا۔ گرو۔ کیوڑہ۔ عطر ہر قسم۔ زعفران۔ کافور۔

معظمات قضیب

معظمات قضیب کا مطلب ہے آلہ تناسل کو لمبار کرنے والی۔

زفت رومی۔ عاقرقرحا۔ پوست کنیر۔ سنکھیا۔ شاہ دیمک۔ بیربہوٹی۔ عشق پیچہ۔ پہاڑی مفرد یا مرکب۔ بیخ نرگس۔ لونگ۔ جوزبوا۔ دار چینی۔ زعفران ہمراہ روغن چنبیلی متواتر لگانا۔ روغن سانڈا۔ روغن زیتون کی مالش۔ بھیڑ کی چربی لگانا۔ کرفس کے جوشاندے سے دھونا۔

مصلب

مُصَلِّب  یعنی سخت کرنے والی۔( hardener)

وہ دوائیں جو انتہائی سرد  اور کثیف ہونے کی وجہ سے عضو یا مواد کو سخت کرتی ہیں۔ جیسے:

کافور۔ گل ارمنی۔ نسپال۔ اسگند۔

مضیق

مضیق کا مطلب ہے تنگ کرنے والی۔

اس سے مراد وہ دوائیں ہیں جوعورت کی اندام نہانی یعنی فرج کو تنگ کرتی ہیں۔ جیسے:

مولسری کی چھال۔ انار کی چھال۔ بکائن کی چھال۔ پوست ڈھاک۔ ماجو پھل۔ کافور شہد میں ملا کر لیپ کرنا۔ اسفنج۔ جوہی۔ سیاہ تل۔ گوکھرو۔ املی کے بیج باریک پیس کر چھڑکنا۔کیکر کی پھلی یا پھول پیس کر چھڑکنا۔

مُفجج

کچا رکھنے والا (ہاضم کی ضد) ۔

مفجج  وہ دوا جو اپنی قوت ِبرودت سے حرارت غریزی اور حرارت غریبہ کے فعل کو باطل کردے یعنی ہضم کو ناتمام اور خلط کو خام رکھے۔

منفث

منہ سے نکالنے والا:

منفث بلغم یعنی  دافع بلغم ، بلغم کو منہ کے راستے نکالنے والا، وہ دوا جو پھیپھڑوں سے منہ کے راستے بلغم کو دفع کرے ۔

منفج

نکالنے والا:

 منفج بلغم یعنی بلغم کا اخراج کرنے والا۔

منضج

منضج کا معنی ہے پکانے والی۔ (Concoctive)

وہ دوا یا غذا جو قوام اخلاط کو معتدل اور خارج ہونے کے قابل بناتی ہیں۔ گاڑھے کو پتلا اور پتلے کو گاڑھا کرتی ہیں۔

منضجات صفرایہ:

عناب گلاب کے پھول۔ بنفشہ۔ گل نیلوفر۔ شاہترہ۔ تخم خبازی۔ تخم کاسنی۔ بیخ کاسنی۔ مکوخشک۔ سکنجبین۔ ترنجبین۔ شربت آلو بخارا۔ شکر شرخ۔ گلقند آفتابی۔ گل خطمی۔ سپستان۔ مقل۔ بادیان۔ ملٹھی۔ شکاعی۔ ایرسا۔

منضجات بلغم:

تخم خبازی۔ تخم خطمی۔ منقی۔ بیخ کاسنی۔ سونف۔ ملٹھی۔ بادیان رومی۔ گاؤزبان۔ پرسیاؤشاں۔ انجیر۔ گلاب کے پھول۔ گلقند۔ سکنجیبین۔

منضجات سودا:

عناب۔ لسوڑیاں۔ گاؤزبان۔ ملٹھی۔ بادرنجبویہ۔ پرسیاؤشاں۔ دونامروا۔ شاہترہ۔ سونف۔ بادیان۔ صندل سرخ۔ گلقند۔ ترنجبین۔ اسطوخودوس۔ سرپھوکہ۔ منڈی۔ ہلیلہ سیاہ۔

منضخ یا نفاخ

یعنی اپھارہ پیدا کرنے والی۔(Flatulent)

اپھارہ کا مطلب ہے پیٹ پھولانے والی۔وہ غذائیں یا دوائیں جن میں رطوبات کی زیادتی ہوتی ہے جس کی وجہ سے وہ حرارت کو کمزور کرکے اس کے فعل سے روک دیتی ہیں۔ جیسے:

جامن کی گری۔ گوبھی۔ لوبیا۔ باقلا۔ موٹھ۔ کرم کلہ۔ چقندر۔ چنا۔ جو۔ اڑد کی دال۔ جھینگا مچھلی۔ گوشت بگلہ۔ شکرقندی۔ اروی۔ کچالو۔ ارہر۔ برگ شلجم۔ لونیا۔ خوبانی۔ بھنڈی۔ بینگن۔ آلو۔ آڑو۔ ناشپاتی۔ کٹھل۔

منبت شعر

منبت شعر کا مطلب ہے بال اگانے والی۔( hair grower)

یعنی وہ دوائیں اور غذائیں جو بال اگاتی ہیں۔ جیسے:

بیری کے پتے۔ چیونٹی کے انڈے۔ چھپکلی جنگلی۔ زلوئے دریائی۔ خطمی۔ ناریل کا تیل۔ روغن زردی انڈہ مرغ۔ بیضہ عنکبوت۔ سم بز۔ روغن آملہ خارجا۔ کنجد سفید و سیاہ خارجی طور پر۔

منوم

مُنَوِّم  یعنی نیند لانے والی۔ (Hypnotic)

وہ ادویات اور غذائیں جو نیند لاتی ہیں۔ جیسے:

پوست خشخاش۔ روغن خشخاش۔ زعفران۔ سویا۔ افیون۔ کسم۔ بنفشہ۔ روغن بنفشہ۔ سبز دھنیا۔ آش جو۔ شیرہ بادام۔ روغن بادام۔ ورغن نیلوفر۔ اجوائن خراسانی۔ گل روغن ۔ گل لالہ۔ روغن کاہو۔ روغن بابونہ۔

مولد منی

مؤلد منی کا مطلب ہےمنی پیدا کرنے والی۔(Fertilant)

وہ دوائیں اور غذائیں جن میں رطوبات زیادہ ہوتی ہیں وہ منی کو بڑھاتی ہیں۔ جیسے:

سورنجاں شیریں۔ کچی پیاز۔ بہمن۔ تخم قرطم۔ بوزیدان۔ بادام۔ حب الزلم۔ خرما۔ ناریل۔ پستہ۔ اندرجو۔ السی۔ ہالون۔ میدہ لکڑی۔ چلغوزہ۔ مکھارا۔ شلجم۔ چنا۔ تودری سفید۔ سونٹھ خشک۔ زعفران۔ مہوا(گل چکاں)۔ گندنا کے بیج۔ ستاور۔ شقاقل۔ دودھ۔ شکر۔ گوشت بطخ۔ مرغ بھنا ہوا۔

مہزل

مُہَزّل  یعنی دبلا پتلا کرنے والی۔ (Emacialic)

کچھ غذائیں اور دوائیں ایسی ہیں جو اخلاط ہیجان میں لاتی ہیں۔ جیسے

گنے کا رس صفرا کو۔ اور ترش چیزیں بلغم کو۔ اور خشک میوے خون کو۔ گریاں سودا کو۔

ناشف

ناشف کا مطلب ہے رطوبات کو جذب کرنے والی۔ (Desiccant)

وہ چیزیں جو رطوبات اور سیال چیزوں کو جذب کرتی ہیں۔ جیسے:

چونا۔ زہرمہرہ۔ سنگجراح۔ سرمہ سفید۔ چھالیہ سوختہ۔

ہاضم

یعنی ہضم کرنے والی۔(Digestive)

وہ دوائیں جو غذا کو ہضم کرکے جزو بدن بناتی اور بھوک بڑھاتی ہیں۔ جیسے:

دیسی اجوائن۔ نرکچور۔ گڑ۔ شہد۔ پپلا مول۔ رام تلسی۔سرکہ۔ جاوتری۔ اچار۔ عرق جامن۔ جامن کا سرکہ۔ مٹھائیاں ہر قسم کی۔ ارنڈ۔ خربوزہ۔ امل بید۔

٭٭٭٭٭٭٭٭٭٭