چھوہارا

نام :

عربی میں تمر يابس، بلح مجفف۔ فارسی میں خرمائے خشک۔ بنگالی میں غرر کھجور۔ اور ہندی میں चुआरा کہتے ہیں۔

(تحریر و تحقیق: حکیم سید عبدالوہاب شاہ شیرازی)

نام انگلش:

Name: Dried dates

Scientific name: Phoenix dactylifera L

Family: palm  / Arecaceae

تعارف:

چھوہارا کھجور کا خشک اور سخت روپ ہے جو تازہ کھجور (تمر، Date) کو دھوپ یا خاص طریقے سے خشک کر کے تیار کیا جاتا ہے۔ اس کی رنگت عموماً سنہری بھوری، سرخی مائل یا گہری بھوری ہوتی ہے۔ چھوہارا تازہ کھجور کے مقابلے میں زیادہ سخت، چبانے میں قدرے مشکل اور ذائقے میں میٹھا مگر قدرے خشک ہوتا ہے۔ اس کی خوشبو کھجور کی ہی مانند مگر نسبتاً ہلکی ہوتی ہے۔کھجور کا درخت Phoenix dactylifera L. دنیا کی قدیم ترین زرعی فصلوں میں شمار ہوتا ہے۔ اس کے پھل کو تازہ حالت میں “کھجور” اور خشک حالت میں “چھوہارا” کہا جاتا ہے۔ چھوہارا زیادہ دیر تک محفوظ رہتا ہے اور صدیوں سے توانائی بخش خوراک کے طور پر استعمال ہوتا آیا ہے۔

یہ بھی پڑھیں: چھوٹی چندن / اسرول

یہ بھی پڑھیں: چھڑیلہ / اشنہ

یہ بھی پڑھیں: چوہا کنی

چھوہارا بنانے کا روایتی طریقہ:

چھوہارا بنانے کا روایتی طریقہ یہ ہے کہ کھجوروں کو پکنے کے آخری مرحلے پر توڑ کر صاف کیا جاتا ہے اور چند منٹ کے لیے اُبال کر دھوپ میں پھیلا دیا جاتا ہے۔ اُبالنے سے جراثیم اور کیڑوں کا خطرہ کم ہوتا ہے، رنگ اور ذائقہ محفوظ رہتا ہے، اور سوکھنے کے بعد دانے زیادہ مضبوط اور محفوظ شکل اختیار کرتے ہیں۔ پھر ان کھجوروں کو کئی دن تک دھوپ میں سکھا کر جب ان کی نمی ختم ہو جائے تو وہ چھوہارا بن جاتے ہیں جو لمبے عرصے تک ذخیرہ اور استعمال کے قابل رہتے ہیں۔

کیمیاوی و غذائی  اجزا:

امریکی محکمہ زراعت (USDA National Nutrient Database) کے مطابق ہر 100 گرام چھوہارے میں غذائی اجزاء، وٹامنز، معدنیات اور فائٹو نیوٹرینٹس کی تفصیل درج ذیل ہے:

بنیادی غذائی اجزاء

توانائی: 277 کیلوریز (14% یومیہ ضرورت)                               کاربوہائیڈریٹس: 74.97 گرام (58%)    پروٹین: 1.81 گرام (3%)

کل چکنائی: 0.15 گرام (<1%)                                کولیسٹرول: 0 ملی گرام (0%)      غذائی ریشہ: 6.7 گرام (18%)

وٹامنز

فولک ایسڈ: 15 مائیکروگرام (4%)              نیاسن: 1.610 ملی گرام (10%)              پینٹوتھینک ایسڈ: 0.805 ملی گرام (16%)

پائریڈوکسین (وٹامن B6): 0.249 ملی گرام (19%)                              رائبوفلاوِن: 0.060 ملی گرام (4.5%)

تھامین: 0.050 ملی گرام (4%)                                وٹامن اے: 149 IU (تقریباً 5%)        وٹامن سی: 0 ملی گرام (0%)

وٹامن کے: 2.7 مائیکروگرام (2%)

الیکٹرولائٹس

سوڈیم: 1 ملی گرام (0%)             پوٹاشیم: 696 ملی گرام (16%)

معدنیات

کیلشیم: 64 ملی گرام (6.5%)     کاپر: 0.362 ملی گرام (40%) آئرن: 0.90 ملی گرام (11%) میگنیشیم: 54 ملی گرام (13%)

مینگنیز: 0.296 ملی گرام (13%)               فاسفورس: 62 ملی گرام (9%)    زنک: 0.44 ملی گرام (4%)    

فائٹو نیوٹرینٹس اور اینٹی آکسیڈنٹس

1. کیروٹینائیڈز

• بیٹا-کیروٹین (β-Carotene): تقریباً 80–90 µg فی 100 گرام
• لیوٹین + زیہزانتھین: تقریباً 20–30 µg فی 100 گرام

یہ آنکھوں کی صحت اور اینٹی آکسیڈنٹ تحفظ میں اہم ہیں۔

2. فلیوونائیڈز (Flavonoids)

• کوئرسٹین (Quercetin)
• ایپیجینن (Apigenin)
• کیٹیچن (Catechin)

یہ مرکبات سوزش کم کرنے اور دل کی بیماری سے بچانے میں مددگار مانے جاتے ہیں۔

3. فینولک ایسڈز (Phenolic acids)

• پی-کومارک ایسڈ (p-Coumaric acid)
• فیورلک ایسڈ (Ferulic acid)
• سنیپک ایسڈ (Sinapic acid)
• گیلک ایسڈ (Gallic acid)

یہ طاقتور اینٹی آکسیڈنٹس ہیں جو خلیاتی نقصانات سے حفاظت کرتے ہیں۔

4. ٹیننز اور پروانتھوسیانائیڈنز

• ٹیننز (Tannins): قابض اور جراثیم کش خصوصیات رکھتے ہیں۔
• پروانتھوسیانائیڈنز (Procyanidins): خون کی نالیوں کو مضبوط کرنے اور اینٹی آکسیڈنٹ کے طور پر مفید۔

5. دیگر بایوایکٹیو مرکبات

• میلاتونن (Melatonin) کی تھوڑی مقدار بھی کھجوروں میں دیکھی گئی ہے جو نیند اور سرکیڈین ردم میں کردار ادا کر سکتی ہے۔
• اسٹرائلز (Sterols): خاص طور پر بیٹا-سائٹوسٹرول (β-sitosterol) کولیسٹرول کم کرنے میں معاون۔

حوالہ: nutrition-and-you

اثرات:

عضلات میں تحریک، غدد میں تقویت اور اعصاب میں تحلیل پیدا کرتا ہے۔ کیمیاوی طور پر رطوبات کو خشک اور حرارت غریزی پیدا کرتا ہے۔ مولد خون، کثیر الغذا، مقوی باہ، حابس، قابض، مسخن، مسمن بدن اثرات کا حامل ہے۔

خواص و فوائد

چھوہارا دوائے غذا ہے، اس لیے اس میں غذائیت کم لیکن خون پیدا کرتا ہے، چونکہ غلیظ بھی ہوتا ہے اس لیے زیادہ استعمال سے خون میں دباو پیدا ہوتا ہے، اور اختلاج قلب ہو جاتا ہے۔ کم مقدار میں استعمال جگر و طحال کے لیے مفید اور مقوی ہے۔ جسم میں طاقت پیدا کرتا ہے، کمر اور گردوں کے عضلات میں طاقت و تحریک پیدا کرتا ہے، مقوی باہ ہونے کی وجہ سے ضعف باہ میں مفید ہے۔ حابس رطوبات اور قابض ہونے کی وجہ سے زکام، درد سر، نزول الماء، بلغمی کھانسی، درد مفاصل کے لیے مفید ہے۔ سیلان الرحم اور اسقاط حمل کی بیماری میں مفید ہے۔ دمہ کے مریضوں کے لیے بہت ہی مفید ہے۔

جدید سائنسی و تحقیقی فوائد

توانائی اور غذائی اہمیت

تحقیقات سے ثابت ہوا ہے کہ چھوہارا فوری توانائی دینے والی قدرتی غذا ہے کیونکہ اس میں قدرتی شکر (گلوکوز، فرکٹوز اور سکروز) کی مقدار زیادہ ہے۔ اس لیے یہ ایتھلیٹس اور کمزوری کے شکار افراد کے لیے مفید ہے۔

ہاضمہ کی بہتری

چھوہارے میں موجود فائبر آنتوں کی حرکت کو بہتر کرتا ہے اور قبض کو کم کرنے میں مددگار ہے۔ جدید مطالعات نے اسے ایک بہترین “Natural Laxative” قرار دیا ہے۔

اینٹی آکسیڈنٹ خصوصیات

چھوہارے میں flavonoids، carotenoids اور phenolic acids پائے جاتے ہیں جو جسم کو فری ریڈیکلز سے بچاتے ہیں۔ یہ خصوصیات دل کی صحت، بڑھاپے کے اثرات کو کم کرنے اور کینسر کے خلاف مزاحمت میں مددگار سمجھی جاتی ہیں۔

دل کی صحت

پوٹاشیم اور میگنیشیم دل کی دھڑکن کو متوازن رکھتے ہیں۔ سائنسی مطالعات میں ثابت ہوا ہے کہ خشک کھجور کا استعمال بلڈ پریشر کو اعتدال میں رکھنے اور دل کے امراض کے خطرات کو کم کرنے میں معاون ہے۔

ہڈیوں کی مضبوطی

کیلشیم، فاسفورس اور میگنیشیم ہڈیوں اور دانتوں کو مضبوط بناتے ہیں۔ طبی تحقیقات نے اسے آسٹیوپوروسس کے خلاف مفید بتایا ہے۔

حمل و زچگی میں فوائد

جدید مطالعات (Journal of Obstetrics and Gynecology, 2011) کے مطابق کھجور اور چھوہارے کے استعمال سے زچگی کے دوران درد کم ہوتا ہے اور نارمل ڈلیوری کے امکانات بڑھتے ہیں۔

مقدار خوراک:

حسب ضرورت