زعفران

نام :

عربی میں زعفران، فارسی میں کیماس، ہندی میں کیسر केसर کہتے ہیں۔

(تحریر و تحقیق: حکیم سید عبدالوہاب شاہ شیرازی)

نام انگلش:

Name: Saffron

Scientific name: Crocus sativus

Family: Iridaceae

تعارف:

زعفران ایک پیاز نما جڑسے اگنے والا پودا ہے جس کی بلندی تقریباً 20 سے 30 سینٹی میٹر ہوتی ہے۔ اس کے پتے باریک، لمبے اور گھاس کی طرح ہوتے ہیں۔زعفران کے پودے پر خوبصورت جامنی (Purple) رنگ کے پھول کھلتے ہیں۔ ہر پھول کے درمیان میں تین گہرے سرخ رنگ کے دھاگے نما ریشے ہوتے ہیں، جنہیں Stigmas کہا جاتا ہے۔ یہی ریشے خشک ہو کر وہ قیمتی “زعفران” بنتے ہیں جو ہم استعمال کرتے ہیں۔اس کی خوشبو بہت تیز اور شہد جیسی میٹھی ہوتی ہے لیکن اس میں گھاس کی سی مہک بھی شامل ہوتی ہے۔اس کا ذائقہ تھوڑا تلخ ہوتا۔  زعفران کی قیمت زیادہ ہونے کی سب سے بڑی وجہ اس کی کاشت میں شامل محنت ہے۔ ایک کلو خشک زعفران حاصل کرنے کے لیے تقریباً 150,000 سے 200,000 پھولوں کو ہاتھ سے چننا پڑتا ہے۔

یہ بھی پڑھیں: زہر مہرہ

یہ بھی پڑھیں: زنگار تانبا

یہ بھی پڑھیں: زرشک / سمبل پھل

کیمیاوی و غذائی  اجزا:

کیمیاوی و بائیو ایکٹو اجزا

کروسیئن (Crocins)           پیکروکروسین (Picrocrocin)           سافرانال (Safranal)

کروکینول (Crocinol)       

فینولک مرکبات

فلاونائیڈز (Flavonoids)                 ٹرائیٹرپینائڈز (Triterpenoids)

کاربوہائیڈریٹس، چھوٹے مقدار میں پروٹینز اور فائبرز

وٹامنز

وٹامن سی ، وٹامن بی1 ، وٹامن بی2 ، وٹامن بی3 ، وٹامن اے ۔

منرلز

پوٹاشیم ، میگنیشیم ، فاسفورس ، کیلشیم ، آئرن ، زِنک ۔

اثرات:

زعفران غدد میں تحریک، عضلات میں تحلیل اور اعصاب میں تسکین پیدا کرتا ہے۔ کیمیاوی طور پر صفراء پیدا کرتا ہے، محرک و مقوی جگر، مخرج بلغم، مدر حیض، مخرج جنین، منقی و مقوی رحم، مقوی باہ، فرحت بخش اثرات رکھتا ہے۔

خواص و فوائد:

زعفران خوشبودار ہونے کی وجہ سے فرحت بخش ہوتا ہے۔ محرک جگر ہونے کی وجہ سے تسکین جگر، عظم جگر و طحال کی حالت کو اصل حالت پر لاتا ہے۔ مخرج جنین ہونے کی وجہ سے تسہیل ولادت کے لیے بہت مفید ہے۔مدر حیض ہونے کی وجہ سے بندش حیض میں مفید ہے۔

جدید سائنسی تحقیقات:

زعفران (Crocus sativus) اپنے منفرد کیمیائی اور بائیو ایکٹو اجزا کی وجہ سے ایک انتہائی قیمتی اور مفید مصالحہ سمجھا جاتا ہے۔ اس میں موجود کروسیئن، پیکروکروسین، سافرانال اور فلاونائیڈز طاقتور اینٹی آکسیڈنٹ خصوصیات رکھتے ہیں جو جسم کو آزاد ریڈیکلز سے بچاتے ہیں اور خلیاتی نقصان کو کم کرتے ہیں۔ سائنسی تحقیقات کے مطابق زعفران دماغی دباؤ اور ڈپریشن کو کم کرنے میں مددگار ہے، نیورولوجیکل صحت کو بہتر بناتا ہے اور موڈ بڑھانے میں مؤثر ہے۔ زعفران کو “Sunshine Spice” بھی کہا جاتا ہے۔ طبی تحقیق کے مطابق یہ ہلکے سے درمیانے درجے کے ڈپریشن اور بے چینی (Anxiety) کو کم کرنے میں اتنا ہی موثر ثابت ہو سکتا ہے جتنی کہ عام ادویات۔ یہ دماغ میں ‘سیروٹونن’ (Serotonin) کی سطح کو متوازن رکھتا ہے جس سے انسان خوش رہتا ہے۔

 اس کے دل پر مثبت اثرات بھی دیکھے گئے ہیں، خون کی روانی کو بہتر بناتا ہے، دل کی صحت کو سہارا دیتا ہے اور قلبی بیماریوں کے خطرے کو کم کرتا ہے۔ مزید برآں، زعفران آنکھوں کی حفاظت کرتا ہے، نظر کی کمی اور عمر رسیدہ آنکھوں کے مسائل کو کم کرنے میں مفید ہے۔ ہاضمے کے نظام پر بھی اس کے فوائد ثابت ہوئے ہیں، یہ معدے کے افعال کو بہتر بناتا ہے، قبض اور ہضم کی خرابیوں میں مددگار ہے اور کھانے کے ذائقے کو خوشگوار بناتا ہے۔ زعفران کا استعمال مدافعتی نظام کو مضبوط کرنے، جلدی بیماریوں کی روک تھام، اور توانائی کی بحالی میں بھی مفید پایا گیا ہے۔

زعفران کی بہت کم مقدار (تقریباً 30 ملی گرام روزانہ) کافی ہوتی ہے۔ 5 گرام سے زیادہ کی مقدار جسم کے لیے زہریلی (Toxic) ثابت ہو سکتی ہے اور شدید صورتوں میں موت کا سبب بھی بن سکتی ہے۔

حوالہ جات:  (وکی پیڈیا)۔  (پی ایم سی)۔  (این آئی ایچ)۔ 

مقدار خوراک:

ایک سے دو رتی