خوب کلاں

نام :

عربی میں خبہ بررالخم خم ۔ فارسی میں شبہ، خاکچی۔ سندھی میں خاکثیر اور ہندی میں کہتے ہیں۔

(تحریر و تحقیق: حکیم سید عبدالوہاب شاہ شیرازی)

نام انگلش:

Name: Hedge Mustard

Scientific name: Sisymbrium officinale

Family: Brassicaceae

تعارف:

خوبکلاں کو خاکسی  یا خاکشی کے نام سے  بھی جانا جاتا ہے۔ خوب کلاں یہ پودا سرسوں کے خاندان (Brassicaceae) سے تعلق رکھتا ہے۔ عام طور پر کھیتوں، ویران زمینوں اور راستوں کے کناروں پر اگتا ہے۔ اس کا تنا باریک، سیدھا اور شاخ دار ہوتا ہے جس کی اونچائی عموماً 30 سے 80 سینٹی میٹر تک پہنچتی ہے۔ پتوں کی ساخت متفرق ہوتی ہے، نچلے پتے بڑے اور گہرے کٹے ہوتے ہیں جبکہ اوپر کے پتے باریک اور نسبتاً چھوٹے ہوتے ہیں۔ اس کے چھوٹے زرد پھول گچھوں کی صورت میں لگتے ہیں جن کی چار پتیاں ہوتی ہیں، جیسے سرسوں کے پھول۔ پھل باریک اور لمبوترا پھلی کی شکل میں ہوتا ہے جو بیجوں سے بھرا ہوتا ہے۔ ذائقہ قدرے تلخ اور تیز ہوتا ہے جبکہ اس کی خوشبو ہلکی سرسوں جیسی محسوس ہوتی ہے۔

جنگلی سرسوں صدیوں سے ایک جڑی بوٹی کے طور پر استعمال ہوتی رہی ہے۔ قدیم یونانی اور رومی طبی ماہرین اسے پھیپھڑوں اور گلے کے امراض کے لیے استعمال کرتے تھے۔ قرون وسطیٰ میں اسے خاص طور پر گلوکاروں اور خطیبوں کے لیے “گلو بوٹی” کہا جاتا تھا کیونکہ یہ آواز صاف کرنے اور گلے کی خشکی دور کرنے میں معاون سمجھی جاتی تھی۔ آج بھی یورپ اور ایشیا کے کئی خطوں میں یہ بطور روایتی دوا استعمال کی جاتی ہے۔

یہ بھی پڑھیں: خولنجاں

یہ بھی پڑھیں: خوبانی

یہ بھی پڑھیں: خطمی

کیمیاوی و غذائی  اجزا:

جدید تحقیق کے مطابق Sisymbrium officinale میں مختلف بایو ایکٹو مرکبات پائے گئے ہیں:

گلوکوسینولیٹس (Glucosinolates)                               گلکوپٹرنجیوِن (Glucoputranjivin)

گلکوکوکلیئرِن (Glucocochlearin)                               گلکوجیابیوٹِن (Glucojiabutin)

سنیگرِن (Sinigrin)           آئیسو تھائیو سائنٹس (Isothiocyanates)

آئیسو پروپل آئیسو تھائیو سائنٹ (Iso-propyl isothiocyanate)

سیک بیوٹل آئیسو تھائیو سائنٹ (Sec-butyl isothiocyanate)

آئیسو بیوٹل آئیسو تھائیو سائنٹ (Iso-butyl isothiocyanate)

ایلل آئیسو تھائیو سائنٹ (Allyl isothiocyanate)

فلیونوئڈز (Flavonoids)

کوئرسیٹن (Quercetin)     کیمفرول (Kaempferol)                 الکلائیڈز (Alkaloids)

ٹیننز (Tannins)                               ضروری تیل (Essential oils)

اثرات:

خوب کلاں عضلات میں تحریک، اعصاب میں تسکین اور غدد میں تقویت پیدا کرتا ہے۔ دافع تپ، حابس رطوبات، منفث بلغم اثرات کا حامل ہے۔

خواص و فوائد

خوب کلاں کے بیج بطور دوا استعمال ہوتے ہیں، اسے جنگلی سرسوں بھی کہا جاتا ہے۔ دافع تپ ہونے کی وجہ سے بلغمی بخار، خسرہ کے بخار، چیچک میں اس کا استعمال بہت ہی مفید ہے۔ خوب کلاں ہر طرح کے بخاروں میں یہ اکسیر کی حیثیت رکھتی ہے۔ مثلاً  بخار ، ٹائی فائیڈ ،خسرہ  وغیرہ۔ خسرہ اور چیچک کے بستر اور جسم پر بھی ان بیجوں کو لگایا جاتا ہے۔خوب کلاں بچوں کے سوکڑے کے لیے بے حد مفید ہے، اخلاط غلیظہ کو نکال دیتی ہے۔ حابس رطوبات ہونے کی وجہ سے دست، قے اور ہیضہ میں اس کا جوشاندہ بہت مفید ہے۔خوب کلاں کا ضماد آشوب چشم، ورم کان، ورم پستان، ورم خصیہ کو دور کرتا ہے۔ عضلاتی محرک ہونے کی وجہ سے قوت باہ کے لیے مفید ہے۔عورت کے رحم کو غلیظ اور فضول رطوبات سے پاک کرکے نطفہ قبول کرنے کے قابل بناتی ہے۔ خوب کلاں خاص طور پر گلے کے امراض جیسے آواز بیٹھ جانا یا بھاری پن میں اسے مفید سمجھا جاتا ہے، اسی وجہ سے اسے “گلوکاروں کی جڑی بوٹی” کہا جاتا ہے۔ گلوکار اکثر پرفارمنس سے پہلے اس کا قہوہ پیتے ہیں۔

جدید سائنسی و تحقیقی فوائد

جنگلی سرسوں (Sisymbrium officinale) سرسوں کے خاندان کا ایک عام پودا ہے، جسے روایتی طور پر “گلوکاروں کی جڑی بوٹی” کہا جاتا ہے کیونکہ یہ آواز بیٹھنے اور گلے کی کمزوری کے علاج میں استعمال ہوتا ہے۔ اس میں گلوکوسینولیٹس اور ان سے بننے والے آئیسو تھائیو سائنٹس (isothiocyanates) پائے جاتے ہیں۔ یہ مرکبات انسانی جسم میں درد اور سوزش کے احساسات اور تیز ذائقے کی پہچان سے متعلق راستوں پر اثر ڈالتے ہیں۔ گلے کی سوزش اور آواز کے مسائل پر اس کے مثبت اثرات کی توثیق یورپ کی کئی فارماکولوجیکل ریسرچز میں کی گئی ہے۔

سائنسی تحقیق کے مطابق اس کے مختلف فوائد درج ذیل ہیں:

• گلے کی خراش اور آواز بیٹھنے میں افاقہ
• کھانسی اور سانس کی تکالیف میں آرام
• اینٹی انفلامیٹری (سوزش کم کرنے والی)
• اینٹی مائیکروبیل (جراثیم کش خصوصیات)
• اینٹی آکسیڈینٹ اور اینٹی کینسر سرگرمیاں (ابتدائی تجربات میں)
• پٹھوں کو ڈھیلا کرنے والے (myorelaxant) اثرات

حوالہ: نیشنل لائبریری آف میڈیسن امریکا۔ 

مقدار خوراک:

پانچ گرام