تباشیر

نام :

عربی میں طباشیر۔ فارسی میں بنسلوچن۔ بنگالی میں بنس کپور کہتے ہیں۔

(تحریر و تحقیق: حکیم سید عبدالوہاب شاہ شیرازی)

نام انگلش:

Name: Bamboo Manna / Vanshlochan

Scientific name: Bambusa arundinacea

Family: Poaceae

تعارف:

تباشیر سفید رنگ کا کرسٹل نما ایک مادہ ہے جو بانس کے اندر سے نکلتا ہے، یعنی بانس کی ایک قسم کی رطوبت ہوتی ہے جو باہر آکر جم جاتی ہے۔ قدیم اور روائتی طب میں یہ کہا جاتا ہے کہ بانس کے اندر جب بارش کے قطرے جمع ہوتے ہیں تو اس سے تباشیر بنتی ہے۔ تاہم، جدید سائنسی تحقیق کے مطابق، تباشیر بانس کے اندرونی خلیوں میں موجود معدنی رسوب (mineral deposits) کا نتیجہ ہوتی ہے، جو مخصوص کیمیائی اور حیاتیاتی عوامل کے تحت بنتی ہے، نہ کہ صرف بارش کے پانی کی وجہ سے۔تباشیر بنیادی طور پر Silica (SiO₂) پر مشتمل ہوتی ہے، جو بانس کے اندرونی خلیوں میں طویل عرصے تک پانی اور معدنیات کے جذب اور اخراج (absorption & excretion) کے عمل کے دوران جمع ہوتی ہے۔ یہ عمل قدرتی طور پر ہوتا ہے اور اس میں بانس کی قسم، ماحولیاتی حالات، اور زمین میں موجود معدنیات کا بھی کردار ہوتا ہے۔

بارش کے پانی میں Silica یا دیگر معدنی اجزا کی زیادہ مقدار نہیں ہوتی، اس لیے یہ براہ راست تباشیر کی تشکیل میں بڑا کردار ادا نہیں کرتا۔بانس کے اندر Silica جذب کرنے اور اسے اندرونی طور پر جمع کرنے کی صلاحیت ہوتی ہے، جو اس کی قدرتی ساخت کا حصہ ہے۔یہ Silica وقت کے ساتھ جمع ہو کر کرسٹل یا سفوفی مواد میں تبدیل ہو جاتی ہے، جسے تباشیر کہا جاتا ہے۔

یہ بھی پڑھیں: تانبا

یہ بھی پڑھیں: تالیس پتر

یہ بھی پڑھیں: تال مکھانہ

کیمیاوی و غذائی  اجزا:

جدید سائنسی تجزیہ کے مطابق، تباشیر میں درج ذیل اجزاء پائے جاتے ہیں:

سلیکا (Silica – SiO₂) : 70 سے 90 فیصد

پوٹاش (Potash – K₂O) : 1 سے 3 فیصد

چونا (Lime – CaO) : 0.5 سے 1.5 فیصد

ایلومینا (Alumina – Al₂O₃) : 0.5 سے 2 فیصد

نامیاتی مرکبات (Organic Compounds) : معمولی مقدار میں

یہ بنیادی طور پر Silica پر مشتمل ہوتا ہے، جو انسانی ہڈیوں، جوڑوں اور جلد کے لیے مفید سمجھا جاتا ہے۔

تباشیر میں وٹامنز نہیں ہوتے کیونکہ یہ معدنی چیز ہے۔

اثرات:

تباشیر محرک قلب، محلل اعصاب اور مسکن غدد ہوتی ہے، کیمیاوی طور پر خون میں خلط سودا پیدا کرتی ہے۔ حابس رطوبات وبلغم، قابض، مبرد، مجفف، مقوی معدہ، ہاضم، مخشس، جاذب، رادع اثرات رکھتی ہے۔

خواص و فوائد

تباشیر مقوی قلب ہوتی ہے، ضعف قلب و بے قراری میں بہت مفید ہے۔ گرمی اور صفراوی اثرات کو ختم کرتی ہے۔ قابض و مجفف ہونے کی وجہ سے آنتوں کو خشک کرکے قے، اسہال اور ہیضہ کو ختم کرتی ہے۔ چونکہ اس کے استعمال سے دل میں طاقت آجاتی ہے اس لیے اسے مقوی قلب بھی کہا جاتا ہے۔ عضلاتی محرک ہونے کی وجہ سے بلغمی کھانسی، بلغمی دمہ، جریان، لیکوریا، ضعف باہ میں بہت مفید ہے۔ یہ مولد سوداء ہوتی ہے اور سوداء ہڈیوں کی خوراک ہے، اس لیے تباشیر ہڈیوں کے لیے بھی مفید ہے۔

کچھ بچوں کو مٹی کھانے کی عادت ہوتی ہے، جو آسانی سے ختم نہیں ہوتی۔ ایسے میں تباشیر (Bamboo Manna) اس عادت کو دور کرنے میں مدد کر سکتی ہے۔ تباشیر کو پیس کر شہد میں ملا کر اس کی گولیاں بنا کر بچوں کو دینے سے ان کے جسم میں کیلشیم کی کمی دور ہو سکتی ہے اور مٹی کھانے کی عادت ختم ہو سکتی ہے۔

تباشیرمیں کیلشیم (Calcium) کی مقدار زیادہ نہیں ہوتی، بلکہ اس میں بنیادی جز سلیکا (Silica) ہوتا ہے، جو ہڈیوں کی مضبوطی میں اہم کردار ادا کرتا ہے۔تباشیر میں موجود سلیکا ہڈیوں کی معدنی کثافت (Bone Mineral Density) بڑھانے میں مدد کرتا ہے، جو ہڈیوں کو مضبوط بناتا ہے۔ حمل کے دوران اگر تباشیر استعمال کی جائے تو یہ بچے کی ہڈیوں اور دانتوں کی نشوونما میں مددگار ثابت ہو سکتی ہے۔ بچوں کو دینے سے یہ ہڈیوں کی مضبوطی میں مدد دیتا ہے اور ان کی جسمانی نشوونما میں اہم کردار ادا کر سکتا ہے۔ عمر بڑھنے کے ساتھ تباشیر کا استعمال جوڑوں کے درد، گٹھیا (Arthritis) اور آسٹیوآرتھرائٹس (Osteoarthritis) سے بچانے میں مددگار ثابت ہو سکتا ہے۔ تباشیر کو دودھ میں ملا کر پینے سے اس کے فوائد مزید بڑھ سکتے ہیں، کیونکہ دودھ میں کیلشیم ہوتا ہے اور تباشیر میں موجود سلیکا ہڈیوں میں کیلشیم کے جذب کو بہتر بناتا ہے۔

جدید سائنسی تحقیقات اورتباشیر کے طبی فوائد:

ہڈیوں اور جوڑوں کی مضبوطی:

سلیکا ہڈیوں اور جوڑوں کے لیے ضروری ہے اور Osteoporosis (ہڈیوں کے بھربھرے پن) میں مفید پایا گیا ہے۔ تحقیق کے مطابق، Silicon-rich compounds ہڈیوں کی معدنی کثافت (Bone Mineral Density) بڑھانے میں مدد دیتے ہیں۔

جلد، بالوں اور ناخن کے لیے مفید:

تباشیر جلد کی قدرتی نمی کو برقرار رکھنے میں مدد کرتا ہے، بالوں کی نشوونما بڑھاتا ہے اور ناخنوں کو مضبوط بناتا ہے۔ ایک تحقیق کے مطابق، Silicon supplementation سے جلد میں کولیجن کی مقدار میں اضافہ ہوتا ہے، جس سے جلد جوان اور صحت مند رہتی ہے۔

دماغی سکون اور نیند میں بہتری:

روایتی طب میں تباشیر کو دماغی سکون اور ذہنی دباؤ کم کرنے کے لیے استعمال کیا جاتا ہے۔ چینی تحقیق کے مطابق، Bamboo silica extract نیورونل فائرنگ کو بہتر بنا کر نیند کے معیار کو بہتر بناتا ہے۔

معدے اور نظام ہاضمہ پر اثرات:

جدید تحقیق کے مطابق، Tabasheer powder antacid (معدے کی جلن کم کرنے والا) اثر رکھتا ہے اور Helicobacter pylori کے خلاف کام کر سکتا ہے۔

ذیابیطس پر اثرات:

2020 میں شائع ہونے والی ایک تحقیق میں تباشیر کے انسولین ریسیپٹرز پر مثبت اثرات پائے گئے، جو بلڈ شوگر کو متوازن رکھنے میں مدد کرتے ہیں۔ کچھ جانوروں پر ہونے والی تحقیق سے معلوم ہوا کہ یہ glucose metabolism کو بہتر کر سکتا ہے۔

بخار اور سوزش کم کرنے میں مددگار:

روایتی طور پر، تباشیر کو بخار کم کرنے، سوزش روکنے، اور پھیپھڑوں کی بیماریوں میں مفید سمجھا جاتا ہے۔ سائنسی تحقیق کے مطابق، اس میں anti-inflammatory اور antipyretic (بخار کم کرنے والے) اجزاء پائے جاتے ہیں۔

احتیاطی تدابیر:

زیادہ مقدار میں استعمال کرنے سے گردے پر اثر پڑ سکتا ہے، کیونکہ Silica زیادہ مقدار میں لینے سے گردے میں پتھری (Kidney Stones) کا سبب بن سکتا ہے۔

مقدار خوراک:

دوگرام