اجمود/کرفس

نام :

اجمود کو فارسی میں کرفس۔ سندھی میں دلجان، بنگالی میں ران کہتے ہیں۔

(تحریر و تحقیق: حکیم سید عبدالوہاب شاہ شیرازی)

نام انگلش:

Name: Umbelliferae Celery Seeds

Scientific name: Apium Graveolens

Family: Apiaceae

تعارف:

اجمود دراصل اجوائن ہی کی ایک قسم ہے یا اس کی فیملی سے تعلق رکھتا ہے، اور اس کا پودا بھی اجوائن کے پودے کی طرح ہوتا ہے البتہ اس کا بیج اجوائن سے موٹا ہوتا ہے۔ جڑ درمیان میں موٹی ہوتی ہے۔ تنا شاخ دار، کھال دار، رسیلا اور سخت ہوتا ہے۔ پتے پنیٹ اور شکل میں بیضوی ہوتے ہیں۔ پھول کا سائز چھوٹا ہے اور سفید ہے۔

یہ بھی پڑھیں: اتیس

یہ بھی پڑھیں: اٹنگن

یہ بھی پڑھیں: ابہل

کیمیاوی و غذائی  اجزا:

اجمود کے بیجوں میں درج ذیل اہم تیل اور کیمیائی اجزا پائے جاتے ہیں:

خوشبودار (Volatile) تیل

بیجوں میں تقریباً 2 فیصد خوشبودار تیل پایا جاتا ہے۔ اس میں لیمونین (Limonene) تقریباً 60 فیصد اور سیلینین (Selinene) تقریباً 20 فیصد شامل ہیں۔ان کے ساتھ ساتھ وہ اجزا جو مخصوص سیلری کی خوشبو دیتے ہیں، بہت کم مقدار (1 سے 3 فیصد) میں پائے جاتے ہیں، مثلاً:

• 3-n-بُوٹائل فٹالائیڈ (3-n-Butylphthalide / Sedanenolide)
• سیڈینولائیڈ (Sedanolide)
• سیڈینونک اینہائیڈرائڈ (Sedanonic anhydride)

ثابت (Fixed) تیل یا چکنائی والے تیزاب (Fatty Acids)

بیج میں تقریباً 15 فیصد تیل پایا جاتا ہے۔ اس میں درج ذیل چکنائی والے تیزاب شامل ہیں:

• پیٹروسیلینک ایسڈ (Petroselinic acid) – تقریباً 64.3 فیصد
• اولیک ایسڈ (Oleic acid) – تقریباً 8.1 فیصد
• لینولیک ایسڈ (Linoleic acid) – تقریباً 18 فیصد
• لینولینک ایسڈ (Linolenic acid) – تقریباً 0.6 فیصد
• پامٹک ایسڈ (Palmitic acid) – تقریباً 9 فیصد

حوالہ: این آئی ایچ۔ 

اثرات:

غدد میں تحریک پیدا کرنے کی وجہ سے خون میں صفراء اور حرارت پیدا کرتا ہے۔عضلات میں تحلیل اور اعصاب میں تسکین پیدا کرتا ہے۔ مجفف ہونے کی وجہ سے جسم میں خشکی پیدا کرتا ہے۔ جالی ہونے کی وجہ سے لیسدار مادوں کو چھیل کر صاف کرتا ہے۔مشتہی ہونے کی وجہ سے بھوک پیدا کرتا ہے۔ جسم کو گرمی دیتا ہے، کاسر ریاح ہونے کی وجہ سے گیس کا اخراج کرتا ہے۔

خواص و فوائد

پیٹ کے کیڑوں کو مارتا ہے۔ بدہضمی، قے، اور اسہال کے لیے بہت ہی مفید ہے، جسم کے دردوں میں مفید ہے، ہچکی کو ٹھیک کرتا ہے۔حیض کو جاری کرتا ہے۔ عرق النساء، نقرس، درد پہلو میں بھی مفید ہے۔ گردہ مثانہ کی پتھری کو خارج کرتا ہے۔

جدید سائنسی تحقیقات

1. بلڈ پریشر، شوگر اور لپڈ پروفائل

ایک جامع تجزیاتی تحقیق (Meta-analysis) میں مختلف مطالعوں کو جمع کر کے دیکھا گیا کہ سیلری یعنی اجمود کے بیج یا اس سے بنی دوائیں بلند فشار خون (ہائی بلڈ پریشر) میں نمایاں کمی کرتی ہیں۔ یعنی سسٹولک اور ڈائیاسٹولک دونوں پریشر کم ہوئے۔ خالی پیٹ بلڈ شوگر (فاسٹنگ گلوکوز) اور ٹرائی گلیسرائیڈز میں بھی کمی پائی گئی۔ البتہ کل کولیسٹرول، LDL، اور HDL پر واضح اثر ثابت نہیں ہوا۔ ایک اور کلینیکل مطالعہ میں 51 مریضوں کو چار ہفتے تک روزانہ تقریباً 1.34 گرام سیلری بیج کا عرق (extract) دیا گیا۔ نتائج میں درج ذیل بہتری دیکھی گئی:

بلڈ پریشر میں کمی، فاسٹنگ بلڈ شوگر اور چکنائی (Lipids) کی سطح میں کمی، جگر (لیور) اور گردوں کے افعال بہتر پائے گئے۔

(حوالہ: PubMed) 

2. دماغی و اعصابی صحت

ایک تحقیقاتی جائزے میں بتایا گیا کہ سیلری اور اس میں موجود ایک خاص جزو 3-n-بوتائل فٹالائیڈ (NBP) دماغی اور اعصابی بیماریوں میں فائدہ دے سکتا ہے۔مثلا:

الزائمر (یادداشت کی خرابی)، پارکنسن (اعصاب کی کمزوری)، فالج (Stroke) کے بعد کی علامات، ڈپریشن اور ذیابیطس سے منسلک اعصابی خرابیاں۔یہ جزو دماغ میں خون کی روانی بہتر کرنے اور سوزش کم کرنے میں مدد دیتا ہے۔

(حوالہ: MDPI)۔ 

3. جراثیم، آکسیڈیٹیو دباؤ اور کینسر کے خلاف اثرات

دیگر مطالعات کے مطابق سیلری یعنی اجمود  کے بیج، پتّے اور تنے میں ایسے مرکبات موجود ہیں جو بیکٹیریا اور فنگس کے خلاف مؤثر ہیں۔ ان میں اینٹی آکسیڈنٹ خصوصیات پائی جاتی ہیں جو جسم کے خلیوں کو نقصان سے بچاتی ہیں۔ بعض تجربات میں یہ بھی دیکھا گیا کہ یہ مرکبات کینسر کے خلیات کی بڑھوتری (Proliferation) کو کم کرتے ہیں۔

(حوالہ: NISCPR، The Pharma Journal)۔ 

4. سمیّت اور حفاظت

جانوروں پر کیے گئے ایک 28 دن کے تجربے میں روزانہ 5000 ملی گرام فی کلوگرام وزن تک سیلری بیج دینے کے باوجود کوئی خطرناک یا زہریلا اثر سامنے نہیں آیا۔ یعنی عام انسانی استعمال کی مقدار میں یہ بیج محفوظ (Safe) سمجھے جا سکتے ہیں۔

(حوالہ: PubMed)۔ 

مقدار خوراک:

تین سے پانچ گرام