یہ ضرورت اس لیے پیش آئی کہ ہماری اسلامی تاریخ میں ہمیشہ حکیم علماء ہی ہوتے تھے، پھر چند سال پہلے حکومت پاکستان نے ایسے قوانین متعارف کروائے جن سے علماء کے لیے طب کا دروازہ بند ہو گیا مثلا میٹرک سائنس کی شرط عائد کرنا۔ چنانچہ ہم دیکھتے ہیں کہ ایک سولہ سترہ سال کا بچہ جس نے فریش میٹرک سائنس کی ہو اسے تو طبیہ کالجز میں داخلہ مل جاتا ہے لیکن دوسرا وہ شخص جس نے میٹرک آرٹس میں کی ہے پھر اس کے بعد آٹھ سالہ درس نظامی کیا ، یا ایف اے، بی اے، ایم اے، ایم فل اور پی ایچ ڈی تک کی ڈگری حاصل کرلی سے اسے داخلہ نہیں دیا جاتا، گویا قانون کی پیچیدگی یہ بتارہی ہوتی ہے کہ سولہ سال کا بچہ جو میٹرک سائنس ہے وہ ایم اے اور پی ایچ ڈی ڈاکٹر سے زیادہ اہل ہے کہ طبیہ کالج میں داخلہ لے کر علم طب سیکھ سکے۔

کسی بھی شعبے کے لیے جو شرائط رکھی جاتی ہیں ان کا ایک مقصد ہوتا ہے، مثلا طبیہ کالج میں داخلے کے لیے میٹرک سائنس کی شرط کا مقصد یہ ہے کہ طبیہ کالج میں داخلے کے لیے میٹرک سائنس کی ذہنی استعداد اور لیول کا شخص ہونا چاہیے، یہ اچھی بات ہے، لیکن دوسری طرف ہم دیکھتے ہیں جس شخص نے اگرچہ میٹرک آرٹس میں کی ہے لیکن اس کے بعد اس نے مدارس، کالجز، یونیورسٹیز میں دس پندرہ سال مزید تعلیم حاصل کی ہے تو اس کی ذہنی استعداد اسے سولہ سترہ سالہ بچے سے زیادہ ہو جاتی ہے، لیکن انہیں طبیہ کالج میں داخلہ نہیں دیا جاتا۔ یہ بہت بڑا تضاد اور پیچیدگی ہے۔

ہمارا مقصد یہ ہے کہ جو شخص صرف میٹرک ہو اس کے لیے تو میٹرک سائنس کی شرط ہونی چاہیے یا ایف ایس سی کی شرط ہونی چاہیے لیکن جس نے میٹرک کے بعد آٹھ سالہ درس نظامی کرلیا ہے یا ایم اے یا ایم فل کرلیا ہے اس کے لیے یہ شرط نہیں ہونی چاہیے۔

اس لیے ہم اس بات کی کوشش کررہے ہیں کہ درس نظامی کی آخری سند شہادۃ العالیہ کی بنیاد پر طبیہ کالجز میں داخلہ آسان بنایا جائے اور حکومت سے یہ منظور کروایا جائے کہ مدارس کے فاضلین کو طبیہ کالجز میں داخلے ملیں۔

اب جو نیا ایکٹ آرہا ہے جس میں حکومت طبیہ کالجز میں داخلے کے لیے ایف ایس سی کو ضروری شرط قرار دینے کا ارادہ رکھتی ہے، یہ اچھی بات ہے لیکن جو ایف ایس سی تو نہیں لیکن اس کے بعد مزید آٹھ دس سال اس نے دیگر تعلیم حاصل کی ہے اور وہ یونیورسٹی لیول کا اور یونیورسٹی ذہنی استعداد کا مالک ہے اسے بھی طبیہ کالج میں داخلہ ملنا چاہیے۔

کچھ دن قبل میں نے ایک نوجوان کو طبیہ کالج میں داخلہ دلوانا چاہا جو عصری علوم میں ایف اے تک پڑھا تھا، اس کے ساتھ ساتھ فاضل درس نظامی تھا، اور مفتی بھی تھا، اور ایم فل کے لاسٹ ایئر میں یونیورسٹی کا طالبعلم تھا، عربی اور انگلش زبانوں کے کورسز کیے ہوئے تھے، لیکن طبیہ کالج نے یہ کہہ کر داخلہ مسترد کردیا کہ  اس کے پاس میٹرک سائنس  کا سرٹیفکیٹ نہیں۔

سرکاری طب کونسل ، وزارت صحت اور حکومت کو ان مسائل کی طرف متوجہ کرنا اور حکیم علماء، اور مدارس کے طلباء کے حق کے لیے یہ جدوجہد کرنا ہمارا مقصد ہے۔