پیاز

نام :

عربی میں بصل۔ بنگالی میں پیاج۔ پنجابی میں گنڈھا کہتے ہیں۔

(تحریر و تحقیق: حکیم سید عبدالوہاب شاہ شیرازی)

نام انگلش:

Name: Onion

Scientific name: Allium cepa

Family: Amaryllidaceae

تعارف:

پیاز مشہور عام سبزی ہے، جسے خود اگایا جاتا ہے، اور ہر سالن کے تڑکے کا ضروری حصہ سمجھا جاتا ہے، بطور سلاد بھی اسے کھایا جاتا ہے۔اس کا پودا ایک سے تین فٹ تک اونچا ہوتا ہے، اور پیاز اس پودے کی جڑ ہوتی ہے جو گیند نما گول ہوتے ہیں۔اس پودے کے ساتھ پھول اور پھر بیج بھی لگتے ہیں یہ بیج بھی بطور دوا کے استعمال ہوتے ہیں۔پیاز میں گندھک بھی پائی جاتی ہے۔ پیاز کا رنگ سرخ اور کچھ کا رنگ سفید بھی ہوتا ہے، سفید پیاز زیادہ تر افغانستان سے آتا ہے۔

یہ بھی پڑھیں: پھوٹ / پھٹ

یہ بھی پڑھیں: پھکر مول / پوکر مول

یہ بھی پڑھیں: پھٹکڑی

کیمیاوی و غذائی  اجزا:

(فی 100 گرام تازہ پیاز)

1. وٹامنز

 وٹامن سی: 7.4 ملی گرام       وٹامن بی1 (تھایامین): 0.046 ملی گرام  وٹامن بی2 (ریبوفلاوین): 0.027 ملی گرام

 وٹامن بی3 (نیاسین): 0.116 ملی گرام   وٹامن بی5 (پینٹوتھینک ایسڈ): 0.123 ملی گرام

 وٹامن بی6 (پائریڈوکسین): 0.12 ملی گرام                   فولیٹ (وٹامن بی9): 19 مائیکرو گرام

2. منرلز

 پوٹاشیم: 146 ملی گرام         کیلشیم: 23 ملی گرام  میگنیشیم: 10 ملی گرام                    فاسفورس: 29 ملی گرام

 آئرن: 0.21 ملی گرام        زنک: 0.17 ملی گرام         کاپر: 0.04 ملی گرام مینگنیز: 0.129 ملی گرام

 سیلینیم: 0.5 مائیکرو گرام

3. دیگر اہم اجزاء

 پانی: 89.1 گرام   فائبر: 1.7 گرام    کاربوہائیڈریٹس: 9.34 گرام   قدرتی شکر: 4.24 گرام

 پروٹین: 1.1 گرام  چکنائی: 0.1 گرام   کلوروجینک ایسڈ، کوئرسیٹن، اینتھوسیانن: (اینٹی آکسیڈنٹ مرکبات)

اثرات:

پیاز محرک عضلات، مقوی غدد اور محلل اعصاب ہوتا ہے۔منفث بلغم، جالی، محمر، مقوی باہ، قابض، حابس رطوبات اور کچا نفاخ  اثرات رکھتا ہے۔

خواص و فوائد

پیاز بطور سلاد اور مصالحہ دونوں طرح استعمال ہوتا ہے۔ پیاز کو گرم کرکے سخت قسم کے دردناک پھوڑوں پر باندھنا مفید ہے ایسی صورت میں یہ تحلیل پیدا کرکے آرام دیتا ہے۔قابض و حابس ہونے کی وجہ سے ہیضہ، قے اور بدہضمی میں مفید ہے۔محمر و جالی اثرات رکھنے کی وجہ سے برص، اور بلغمی علامات میں بطور ضماد استعمال کیا جاتا ہے۔پیاز وبارئی امراض جیسے ہیضہ، نزلہ و زکام اور بلغمی کھانسی  میں بہت ہی مفید ہے۔اگر کان کے اندر پھنسی ہو تو پیاز کو گرم کرکے اس کا پانی کان میں ٹپکانے سے فائدہ ہوتا ہے۔

پیاز دافع ضرر و سموم اور مصفی آب و ہوا بھی ہے، حالت سفر میں مختلف علاقوں کے پانی اور آب و ہوا کے ضرر کو دفع کرنے کےلیے پہلے لوگ ساتھ رکھتے تھے۔پاگل کتے کا زہر اعصابی عضلاتی ہوتا ہے، اگر کسی کو پاگل کتا کاٹ لے تو اس کے زہر کے لیے پیاز بہترین تریاق ہے۔ پیاز کا اچار اعصابی امراض کے لیے بہت مفید ہے۔پیاز کا پانی مولد منی ہے جس سے انتشار، شدت، تیزی اور شہوت پیدا ہوتا ہے۔ اگر کسی کو اعصابی بیہوشی آگئی ہو، مثلا عورتوں کو ہسٹیریا کا دورہ پڑتا ہے ایسی صورت میں پیاز کو کوٹ کر سنگھانے اور ناک میں یا آنکھوں میں پیاز کا پانی ٹپکانے سے فورا ہوش آجاتا ہے۔ دانتوں کا ہلنا بھی اعصابی تحریک میں ہوتا ہے ایسے لوگ پیاز استعمال کریں تو دانت مضبوط ہو جاتے ہیں۔

جدید سائنسی تحقیقات:

طبی فوائد

(1) اینٹی بیکٹیریل اور اینٹی فنگل خصوصیات

پیاز میں موجود سلفر مرکبات اور فلیوونائیڈز مختلف جراثیم اور فنگس کے خلاف کام کرتے ہیں، اور انفیکشنز کو روکنے میں مدد دیتے ہیں۔

(2) کینسر سے تحفظ

 تحقیق سے ثابت ہوا ہے کہ پیاز کا باقاعدہ استعمال بڑی آنت، پھیپھڑوں، جگر، دماغ، معدہ، رحم، پروسٹیٹ اور چھاتی کے کینسر کے خطرے کو کم کر سکتا ہے۔

(3) دل کی صحت اور ذیابیطس کے لیے مفید

پیاز  میں موجود آرگنوسلفر مرکبات، پولی فینولز اور فلیوونائیڈز خون کو پتلا رکھنے میں مدد دیتے ہیں، جو دل کی بیماریوں (CVDs) کے خلاف مؤثر ہو سکتے ہیں۔ذیابیطس (Diabetes Mellitus) کے مریضوں میں بلڈ شوگر کنٹرول میں مددگار۔

(4) زخموں اور جلد کی بیماریوں میں مددگار

 پیاز کا چھلکا ہائپر ٹرافک داغ (Hypertrophic Scars) اور کیلوئڈ (Keloid) کی روک تھام میں مفید پایا گیا ہے۔ پیاز کے عرق سے ہائپر ٹرافک زخموں (بڑے زخم) کے علاج میں بہتری دیکھی گئی ہے۔

(5) سانس کی بیماریوں اور مدافعتی نظام میں بہتری

دمہ  Asthma اور دیگر سانس کی بیماریوں میں پھیپھڑوں کی سوزش کم کرنے میں مددگار۔ Quercetin اور سلفر مرکبات مدافعتی نظام کو بہتر بناتے ہیں اور موسمی الرجی کے خلاف کام کرتے ہیں۔ پیاز دمہ اور دیگر پھیپھڑوں کی بیماریوں میں حفاظتی اور سوزش کم کرنے والے اثرات رکھتا ہے۔  یہ سانس کی نالی کی حساسیت اور سوزش کو کم کر کے سانس لینے میں بہتری لا سکتا ہے۔  مدافعتی نظام پر مثبت اثر ڈالتا ہے، خاص طور پر IgE اور IL-4 جیسے دمہ سے متعلق عوامل کو کم کرتا ہے۔  اینٹی آکسیڈنٹ خصوصیات کی وجہ سے یہ پھیپھڑوں کے ٹشوز کو نقصان سے بچانے میں مدد کرتا ہے۔  یہ تحقیق اس بات کی تصدیق کرتی ہے کہ پیاز کا عرق سانس کی بیماریوں، خاص طور پر دمہ کے علاج میں ایک مؤثر قدرتی دوا ہو سکتا ہے۔

(6) جگر کی حفاظت (Hepatoprotective Effects)

پیاز کے بلب سے نکالا گیا پانی کا عرق جگر کے لیے حفاظتی اثرات رکھتا ہے، خاص طور پر ایتھنول سے متاثرہ جگر کے زہریلے اثرات کو کم کرتا ہے۔ پیاز جگر کی صحت کے لیے ایک مؤثر قدرتی ہیپاٹوپروٹیکٹو علاج ثابت ہوسکتا ہے۔ پیاز  پیراسیٹامول اور الکوحل سے پیدا ہونے والے جگر کے نقصان کے خلاف تحفظ فراہم کرسکتا ہے۔ اس میں موجود اینٹی آکسیڈنٹس جگر کے خلیات کو آکسیڈیٹیو نقصان سے بچانے میں مدد دیتے ہیں۔  پیاز کے بیرونی چھلکوں میں زیادہ غذائی اجزاء اور اینٹی آکسیڈنٹس ہوتے ہیں، جنہیں کھانے سے جگر کے افعال کو بہتر بنایا جا سکتا ہے۔

 (7) ذہنی صحت اور اینٹی ڈپریسنٹ اثرات

 مطالعات سے پتہ چلا ہے کہ پیاز کا استعمال ڈپریشن اور ذہنی دباؤ کو کم کر سکتا ہے۔Quercetin اور دیگر اینٹی آکسیڈنٹس دماغی افعال کو بہتر بنانے میں مددگار ہیں۔

(8) اینٹی بیکٹیریل اور اینٹی فنگل خصوصیات

 پیاز کا عرق مختلف بیکٹیریا جیسے E. coli اور Staphylococcus aureus کے خلاف مؤثر ثابت ہوا ہے​۔

(9)عمومی زہریلا اثر اور ممکنہ خطرات

 زیادہ مقدار میں پیاز کھانے سے کچھ انسانوں میں معدے کی جلن، بدہضمی، یا گیس ہوسکتی ہے۔  خون کو پتلا کرنے کی صلاحیت رکھنے کے باعث، پیاز زیادہ مقدار میں کھانے سے خون بہنے (Bleeding) کا خطرہ بڑھ سکتا ہے، خاص طور پر وہ افراد جو پہلے سے خون پتلا کرنے والی دوائیں لے رہے ہوں۔  پیاز کے عرق کی زیادہ مقدار سے سپرم کی مقدار میں کمی دیکھی گئی۔حرکت پذیری (Motility) میں بھی کمی واقع ہوئی، جو ممکنہ طور پر تولیدی مسائل پیدا کر سکتی ہے۔

کتوں اور کچھ دیگر پالتو جانوروں (بلیوں، گھوڑوں) کے لیے پیاز زہریلا ثابت ہوسکتا ہے، اور اس کے استعمال سے خون کی کمی پیدا ہوسکتی ہے۔

 اگرچہ پیاز میں کئی طبی فوائد موجود ہیں، لیکن کچھ مقداروں میں اس کے زہریلے اثرات بھی ہوسکتے ہیں، خاص طور پر مخصوص جانوروں کے لیے۔  زیادہ مقدار میں پیاز کھانے سے انسانوں میں معدے کی خرابی، آنتوں کی جلن، یا خون کے پتلے ہونے کا خطرہ بڑھ سکتا ہے۔  DNA کو ممکنہ نقصان پہنچانے کی صلاحیت کی وجہ سے اس پر مزید تحقیق کی ضرورت ہے۔ 

پیاز (Allium cepa) اور نکوٹین، سانپ کے زہر، اور شہد کی مکھیوں کے ڈنک کے خلاف اثرات

1۔ نکوٹین کے زہریلے اثرات اور پیاز کا کردار

 نکوٹین ایک قدرتی الکلائڈ ہے جو تمباکو نوشی کے ذریعے جسم میں داخل ہوتا ہے اور پھیپھڑوں کو نقصان پہنچاتا ہے۔ یہ پھیپھڑوں میں انحطاطی تبدیلیوں کا باعث بنتا ہے اور پھیپھڑوں کے کینسر اور COPD جیسے امراض کے لیے بنیادی خطرہ سمجھا جاتا ہے۔  پیاز کے عرق (Onion Extract) نے نکوٹین کے نقصان دہ اثرات کو کم کرنے میں مدد دی، لیکن یہ مکمل طور پر نقصان کو ختم کرنے میں کامیاب نہیں ہوا۔ اگرچہ پیاز نکوٹین کے مضر اثرات کو کم کرنے میں مددگار ثابت ہوا، لیکن یہ نکوٹین سے ہونے والے تمام نقصانات کو مکمل طور پر ختم کرنے میں ناکام رہا۔

2۔سانپ کے زہر (Naja naja karachiensis – پاکستانی کوبرا) کے خلاف پیاز کے اثرات

 پاکستانی کوبرا (Naja naja karachiensis) جنوبی ایشیا کے زہریلے سانپوں میں شامل ہے۔ اس کے زہر کے اثرات میں ہائپوٹینشن، ورم، فالج، کارڈیک گرفت، خون بہنا، اور ہیمولیسس شامل ہیں۔ سانپ کا زہر انسانی سرخ خون کے خلیے (HRBC) کی جھلی کو غیر مستحکم کرتا ہے، جو ہیمولیسس (خون کے سرخ خلیوں کی تباہی) کا باعث بنتا ہے۔  تحقیق میں پایا گیا کہ A. cepa (پیاز) کے بلب سانپ کے زہر کے ہیمولیسس کو بے اثر کرنے میں مددگار ثابت ہوئے۔اور پیاز نے درج ذیل اثرات دکھائے:

• PLA2 انزائم کو 76% تک روکا (یہ انزائم زہر کے اثرات کو بڑھاتا ہے)
• PLA2 کی ہائیڈرولائٹک سرگرمی کو 50% تک کم کیا
• 5′-Nucleotidase کی سرگرمی کو روکنے میں ناکام رہا
• پیاز نے n. karachiensis زہر کے بعد CK-MB (Cardiac Marker) کی سطح کو بہتر کرنے میں مدد دی۔
  • HRBC جھلی کے استحکام میں بھی پیاز کا اہم کردار پایا گیا، جس نے ہیمولیسس کے خطرے کو کم کیا۔

3۔ شہد کی مکھیوں کے ڈنک کے خلاف پیاز کے اثرات

 شہد کی مکھیوں کے ڈنک میں زہریلے پروٹین اور کیمیکل ہوتے ہیں جو درد، سوجن، اور بعض اوقات الرجک ردعمل (Anaphylaxis) کا سبب بن سکتے ہیں۔ ترکی میں کی گئی تحقیق میں پایا گیا کہ شہد کی مکھیوں کے ڈنک کے بعد پیاز کے عرق کا استعمال ایک مؤثر علاج ہوسکتا ہے۔ یہ مکھی کے زہر سے ہونے والے ممکنہ جان لیوا اثرات کو کم کرنے میں مددگار ثابت ہوسکتا ہے۔

4۔سنکھیا کے اثرات

آرسینک (Arsenic) یعنی سنکھیا  ایک بھاری دھات ہے جو زہریلے مرکبات بنانے کی صلاحیت رکھتی ہے۔ یہ عام طور پر زمینی پانی کو آلودہ کرتا ہے اور صحت پر مہلک اثرات مرتب کر سکتا ہے۔ اس کے زہریلے اثرات خاص طور پر گردوں، جگر، اور دماغ پر نمایاں ہوتے ہیں۔پیاز  آرسینک کے زہریلے اثرات کو کم کرنے اور ہسٹولوجیکل تبدیلیوں (Tissue Damage) کو ریورس کرنے میں مددگار ثابت ہوا ہے۔کیونکہ یہ آرسینک کو خلیاتی سطح پر بے اثر کر سکتا ہے اور جسم سے اس کے اخراج میں مدد دیتا ہے۔

حوالہ جات:           نیشنل لائبریری آف میڈیسن۔ 1  ،  2

مقدار خوراک:

دس گرام